Rossiyada 21-sentabr kuni safarbarlik boshlanganidan keyin Qozog‘iston hududiga 400 mingdan ortiq rossiyalik kirgan. Bu haqda Qozog‘iston mehnat va aholini ijtimoiy muhofaza qilish vaziri Tamara Duysenova ma’lum qildi.
“Bizdagi har kuni yangilanadigan tezkor ma’lumotlarga ko‘ra, 400 mingdan biroz ko‘proq rossiyalik mamlakatimizga kelgan, 320 mingdan ko‘prog‘i chiqib ketgan va 100 mingga yaqin rossiyalik hali ham shu yerda qolmoqda”, — dedi vazir.
4-oktabr kuni Qozog‘iston Ichki ishlar vazirligi Rossiyadagi ikki haftalik safarbarlik davomida mamlakatning 200 mingdan ortiq fuqarosi Qozog‘istonga kirgani haqida xabar bergandi. Vazirlik ma’lumotlariga ko‘ra, shundan keyin ularning 147 ming nafari mamlakatni tark etgan.
Noyabr oyi boshida mamlakat bosh vaziri Alixon Smailov Qozog‘istonga kirgan rossiyaliklar soni safarbarlik sharoitida keskin oshganidan keyin yana normal holatga qaytganini aytdi.
Izoh (0)