Mojarolarning oldini olish bo‘yicha Rossiya va AQSH o‘rtasida yaratilgan maxsus aloqa liniyasidan ikki mamlakat harbiylari Ukrainadagi urush davrida faqat bir marta foydalangan. Bu haqda Reuters AQSH ma’muriyati vakiliga tayanib xabar berdi.
Rasmiyning anonim qolish sharti bilan ma’lum qilishicha, AQSH “ixtilofni bartaraf etish” deb nomlangan ushbu liniya bo‘yicha faqat bir marta qo‘ng‘iroq qilgan va unda Rossiya harbiylarining Ukrainaning muhim infratuzilmasi yaqinidagi harakatlaridan xavotir bildirgan.
Agentlik suhbatdoshi muzokaralar shartlariga aniqlik kiritmadi, ammo ular 15-noyabr kungi Polshada raketa qulashi bilan bog‘liq hodisaga aloqador emasligini ta’kidladi.
Reuters avvalroq AQSH Rossiya qo‘shinlari nazorati ostidagi Zaporojye atom elektr stansiyasi atrofidagi vaziyatdan xavotir bildirgani haqida eslatdi.
2022-yilning mart oyida yaratilgan “ixtilofni bartaraf etish” liniyasi AQSH Yevropa qo‘mondonligi va Rossiya Federatsiyasining Milliy mudofaa nazorati markazini bog‘laydi.
Izoh (0)