“Daryo” nashri 29-noyabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Ukraina hozircha NATOga qabul qilinmaydi, ammo Yevropaning 7 davlati Ukrainaga yordam bermoqchi
NATO mamlakatlari tashqi ishlar vazirlari Buxarestdagi uchrashuvda Ukraina uchun alyans eshiklari ochiqligini, ammo “hozir uning a’zo bo‘lishi uchun qulay fursat emasligi”ni e’lon qiladi. Bu haqda Bloomberg o‘z manbalariga tayanib xabar bermoqda. Vazirlar Ruminiya poytaxtida 29-noyabr kuni uchrashadi.
Ismini oshkor qilmagan yevropalik diplomatning so‘zlariga ko‘ra, NATOning ba’zi mamlakatlari alyansga a’zolik yo‘lida “Kiyevga ochiqroq yo‘l taqdim etish”ni talab qilmoqda, biroq bu masalada konsensus mavjud emas.
Bloomberg ma’lumotlariga ko‘ra, Ukraina ittifoqchilari uning NATOga qo‘shilish bo‘yicha so‘roviga ehtiyotkorlik bilan yondashgan, chunki “blokning kollektiv mudofaa bo‘yicha majburiyatlari ularni Rossiya bilan to‘g‘ridan-to‘g‘ri ziddiyatga tortishi mumkin”.
Ayni vaziyatda Yevropaning 7 davlati Ukrainaga qishdan chiqishda yordam berishni va’da qilmoqda
Suriyadagi kurdlar Rossiyadan hududlarini himoya qilishda yordam so‘radi
Kurdlarning “Suriya demokratik kuchlari” alyansi mamlakat shimoli-sharqidagi kurdlar nazoratida bo‘lgan hududlarni himoya qilish bo‘yicha Damashq hukumati bilan kelishuvga erishishda Rossiya vakillaridan yordam so‘radi. Bu haqda SDK vakili Aram Xonga tayanib, “RIA Novosti” xabar berdi.
“Biz Rossiya vakillaridan Damashq rasmiylari bilan hududimizni himoya qilish yuzasidan harakatlarni muvofiqlashtirish bo‘yicha kelishuvga tashabbus ko‘rsatishni so‘radik”, — dedi u.Qayd etilishicha, Rossiya tomoni bilan uchrashuv o‘tkazilgan, unda Turkiyaning SDKga shartlari o‘rtaga tashlangan. SDS bu shartlarni rad etgan.
Aram Xon, shuningdek, AQSH Anqaraning Suriya shimoli-sharqidagi harbiy amaliyotiga qarshi ekanini tasdiqlagan bo‘lsa-da, mojaroni hal qilish uchun jiddiy qadamlar qo‘ymaganini aytdi.20-noyabrdan beri Turkiya Suriya shimolida “Kurdiston ishchilar partiyasining” Suriya qanotiga qarshi havo operatsiyasini o‘tkazmoqda – unda Kobani shahriga, shuningdek, Iroq shimoliga zarbalar berilgani xabar qilingan. Turkiya prezidenti Toyib Erdo‘g‘on operatsiyani muvaffaqiyatli deb atadi va uning ortidan quruqlikdagi operatsiya o‘tkazilishini istisno qilmadi.
O‘zbekistonda haydovchilar uchun jarima ballarini hisoblash tizimi test rejimida ishga tushiriladi
O‘zbekistonda qoidabuzar haydovchilar uchun jarima ballari tizimi joriy etilishi haqida xabar berilgan edi. Yo‘l harakati xavfsizligi xizmati ushbu tizim 1-dekabrdan boshlab test rejimida ishga tushirilishini ma’lum qildi.
Har bir yo‘l harakati qoidabuzarligi uchun 12 oy davomida alohida jarima ballarini hisoblab borish, hisoblangan jarima ballari belgilangan miqdordan oshgan hollarda haydovchini ma’lum muddatga transport vositasini boshqarish huquqidan mahrum qilish, qoida buzmagan haydovchilarga keyinchalik hisoblangan jarima ballarini qisqartirish orqali rag‘batlantirish choralari qo‘llanishi tartibini nazarda tutuvchi haydovchilarga yo‘l harakati qoidabuzarligi uchun jarima ballarini hisoblash tizimini joriy etish belgilangan.
Hozirgi kunda qonun loyihasi takomillashtirish jarayonida, shunga ko'ra 1-dekabrdan boshlab jarima ballarini hisoblash tizimi test rejimida ishga tushiriladi.
Bunda qoidabuzarliklar avtomatik tarzda dasturiy ta’minotda qayd etib boriladi. Ushbu tizim yangi bo‘lganligi sababli, test rejimida ishlagan vaqtda tizimdagi hamda sodir etilgan qoidabuzarliklardagi barcha xato va kamchiliklar tizimni texnik qo‘llab-quvvatlash davrida bosqichma-bosqich aniqlanib, bartaraf etilib, takomillashtirilib boriladi.
Izoh (0)