Toshkent shahar, Yunusobod tumanidagi “An-Nur” to‘yxonasi kimoshdi savdosiga qo‘yildi. Lot ma’lumotlari “E-auksion” portalida e’lon qilingan. 

Lot izohida yozilishicha to‘yxona auksionga iqtisodiy sudlar hukmi bilan Yunusobod tuman MIB tomonidan joylashtirilgan va jihozlarsiz sotilmoqda. 2009-yilda qurilgan 2 qavatli bino 8 ta xonadan iborat. 

Yer uchastkasining umumiy maydoni 0,04 gektar. Binoning maydoni — 959 kvadrat metr. To‘yxonada gaz, suv, elektr ta’minoti va kanalizatsiya tizimi mavjud. 

Auksionga qo‘yilgan to‘yxonaning boshlang‘ich bahosi — 6,3 mlrd so‘m. Arizalar 26-dekabr 09:00 ga qadar qabul qilinadi. Savdolar xuddi shu kuni 10:00 da boshlanadi.

Avvalroq Toshkent viloyatidagi parranda fabrikasi 35 mlrd so‘mga auksionga qo‘yilgani haqida xabar berilgan edi.