Sirdaryo viloyati Xovos tumanida sug‘oriladigan yer maydonini o‘zboshimchalik bilan egallab olgan fermer xo‘jaligi aniqlandi, deb xabar beradi Iqtisodiy jinoyatlarga qarshi kurashish departamenti.
Qayd etilishicha, Bosh prokuratura huzuridagi departamentning Sirdaryo viloyat boshqarmasi tomonidan tergovga qadar tekshiruv o‘tkazilgan. Unda “Z.A.” fermer xo‘jaligi rahbari N.M. xo‘jalikka baliqchilik ko‘li qurish uchun Xovos tumani hududidan ajratilgan yer maydoniga ortiqcha 5,5 gektar yer maydonini egallab olgani aniqlangan. Shundan 3,01 gektari sug‘oriladigan yer maydonida o‘zboshimchalik bilan baliqchilik ko‘li tashkil qilgan. Oqibatda davlat va jamiyat manfaatlariga 1,3 milliard so‘m zarar yetkazgan.
Holat yuzasidan Jinoyat kodeksining 192-11-moddasi (nodavlat tijorat tashkilotida yoki boshqa nodavlat tashkilotida mansabdor shaxslar tomonidan o‘z vakolatlarini suiiste’mol qilish) va 229-moddasi (o‘zboshimchalik) bilan jinoyat ishi qo‘zg‘atilgan. Hozirda tergov harakatlari o‘tkazilmoqda.
Izoh (0)