Belgiyaning mundiallardagi g‘alabali seriyasi yakunlandi. Jamoa Braziliyaning rekordini yangilay olmadi

Belgiya terma jamoasi JCH—2022 2-turida Marokashga yutqazib qo‘ydi (0:2).

Belgiyaning Jahon Chempionatlari guruh bosqichidagi 8 o‘yindan iborat g‘alabali seriyasi yakunlandi. “Qizil iblislar” JCH—2014 dan beri mundial guruh bosqichida g‘alabaga erishayotgandi. Shuningdek, belgiyaliklar musobaqa guruh bosqichida 1994-yildan keyin ilk bor yutqazdi. Bu davr davomida 8 g‘alaba va 5 durang qayd etilgandi.

Shu tariqa Belgiya bu borada Braziliyaning rekordini yangilashni uddasidan chiqmadi. “Pentakampionlar” mundiallar tarixida ikki marta (1986—1994 va 2002—2010) guruh bosqichida 8 g‘alabali seriya qayd etgan.

Belgiya JCH—2022 dastlabki ikki turida 1 ta gol urdi. Bu jamoa uchun musobaqa doirasida 1930-yildan (2 o‘yinda 0 gol) keyingi eng yomon natija.

Belgiya barcha musobaqalar doirasidagi so‘nggi 19 o‘yinida 7 ta mag‘lubiyatni qabul qilib oldi (9 g‘alaba, 3 durang). Bundan avval jamoa 74 ta o‘yinda (57 g‘alaba, 10 durang) xuddi shuncha yutqazgandi.