Xitoyning Shinjon-Uyg‘ur muxtor hududidagi Urumchi shahrida ko‘p qavatli turar joy binosi yonib ketdi. Oqibatda o‘n kishi halok bo‘ldi, to‘qqiz kishi jarohatlandi. Bu haqda hudud partiya qo‘mitasining targ‘ibot bo‘limiga tayanib, Sinxua axborot agentligi xabar berdi.
Yong‘in osmono‘par binoning 15-qavatida boshlangan, so‘ng 17-qavatga tarqalgan. Agentlik ma’lumotlariga ko‘ra, tutun binoning 21-qavatiga ham yetib borgan. Ayni paytda yong‘in to‘liq bartaraf etilgan. Barcha jabrlanganlar tutundan zaharlanish tashxisi bilan kasalxonaga yotqizilgan.
Dastlabki ma’lumotlarga ko‘ra, yong‘inga xonadonlardan biridagi yotoqxonada elektroshitdan o‘t chiqishi sabab bo‘lgan.
Avvalroq Xitoyning Xenan provinsiyasi Anyan shahridagi Kaixinda Trading Co Ltd. zavodida yong‘in chiqib, oqibatda 36 kishi halok bo‘lgandi.
Izoh (0)