Bryussel Londonga Birlashgan Qirollikning yadroviy tiyib turish salohiyatini qo‘llab-quvvatlash uchun zarur bo‘lgan texnologiyalarni yetkazib berishni bloklab qo‘yganidan keyin Belgiya va Buyuk Britaniya o‘rtasida ziddiyat yuzaga keldi, deb xabar bermoqda The Times.
O‘tgan hafta Bryussel Flamandiya hududida ishlab chiqarilgan va Britaniya armiyasi uchun mo‘ljallangan yadro materiallarini eksport qilishdan bosh tortgani haqida LN24 nashri o‘z manbalariga tayanib xabar bergan edi. Uning ma’lumotlariga ko‘ra, ularning yetkazib berilishiga ekologlar qarshi chiqqan. The Times aniqlik kiritishicha, gap Antverpendagi EPSI kompaniyasi tomonidan ishlab chiqarilgan yuqori bosimli izostatik press haqida bormoqda. Britaniya ushbu texnologiyadan Oldermastondagi Atomic Weapons Establishment korxonasida ishlab chiqarish jarayonining bir qismi sifatida foydalanadi, korxona yadroviy jangovar kallaklarni ishlab chiqish, chiqarish va ularga xizmat ko‘rsatish uchun mas’uldir.
Buyuk Britaniya Yevroittifoq tarkibidan chiqqach, ushbu texnologiyani eksport qilish uchun litsenziya talab etildi. The Times yozishicha, litsenziya taqdim etilishiniBelfiya bosh vaziri, “Ekolo” yashil partiyasi a’zosi Jorj Gilkine bloklab qo‘ygan. Gazetaning Bryusseldagi manbalariga ko‘ra, Britaniya Belgiyada ishlab chiqarilgan FN Herstal pulemyotlariga 600 million yevrolik buyurtmani bekor qilish haqida tahdid qilganidan keyin ikki mamlakat o‘rtasidagi bahs kuchayib ketgan.
Flamandiyaning Business AM nashri Belgiya hukumatidagi yuqori mansabli manbasiga tayanib yozishicha, Antverpenda ishlab chiqariladigan izostatik press noyob texnologiya hisoblanadi. Ammo Times’ning Britaniya harbiy-dengiz flotidagi manbasi ularning yetkazib berilmasligi armiya jangovar shayligiga ta’sir o‘tkazmasligini aytdi. Shunga qaramay, deb yozadi nashr, Bryussel Yevropada jangovar harakatlar davom etayotgan paytda (Rossiyaning Ukrainadagi harbiy operatsiyasi nazarda tutilmoqda) ushbu ziddiyat “G‘arb va NATOning hamjihatligini xavf ostiga qo‘yishi”dan xavotirda.
Avvalroq Belgiya bosh vaziri Aleksandr de Kro Britaniyaga yadro texnologiyasi eksporti bo‘yicha yakuniy qaror hali qabul qilinmagani, yadro quroli tarqatmaslik bo‘yicha hukumat komissiyasi qarori kutilayotganini aytgandi. Valloniya hududi hukumati Birlashgan Qirollikka FN Herstal qurolini yetkazib berish bo‘yicha shartnoma “hamon muzokaralar bosqichida turgani”ni ma’lum qildi.
Mavzuga doir: NATO Yevropada yadroviy o‘quv mashqlarini boshlaydi
Izoh (0)