“Qachon kelasan 13?” — Toshkentda 13-avtobus soatlab kutilganiga izoh berildi

Ijtimoiy tarmoqlarda Toshkent shahrida fuqarolar 13-avtobus kelishini kutayotgani aks etgan fotosuratlar tarqaldi. “Toshshahartransxizmat” holatga munosabat bildirdi.

Qayd etilishicha, 7-avtobus saroyi filialiga biriktirilgan 13-sonli Izza mavzesi–Toshkent MUM avtobus yo‘nalishida  jadval asosida ish kunlari 6 ta, shanba va yakshanba kunlari 5 ta MAN A22 va Mercedes-Benz LF avtobuslari ishga chiqariladi. Avtobuslar 20—21 daqiqa vaqt oralig‘ida yo‘nalishda transport qatnovini tashkil etilishi belgilangan.

Joriy yilning 23-noyabr kuni 13-sonli yo‘nalishga belgilangan jadval asosida 6 ta avtobus ishga chiqarilgan bo‘lib, yo‘nalish vaqtida saroy raqami 303, 312 va 301-bo‘lgan avtobuslarda yuzaga kelgan texnik nosozliklar sababli mazkur transport vositalari 7-avtobus saroyi filialiga belgilangan vaqtdan oldin qaytgan. Shu sababli yo‘nalishda avtobuslar qatnov oraliq vaqti uzayib ketgan.

“Bugungi kunda mazkur 13-sonli avtobus yo‘nalishida xizmat ko‘rsatuvchi avtobuslardagi texnik nosozliklarni bartaraf etish, yo‘nalishga kerakli miqdorda avtobuslarni ishga chiqarish choralari ko‘rilganligini ma’lum qilamiz”, — deyiladi xabarda.