Agar sog‘liq va vazn haqida qayg‘ursangiz, kun davomida to‘q yurish uchun nonushta muhim oziq moddalar, shuningdek, ko‘p miqdorda oqsil hamda sog‘lom yog‘lar bilan boyitilganiga ishonch hosil qilish kerak. Bu ortiqcha vazndan xalos bo‘lishga va qomatni chiroyli saqlashga yordam beradi. Yaxshi nonushta — bu har qanday kunni to‘g‘ri boshlash kerak bo‘lgan jarayon. Marie Claire nashri qorin sohasidagi yog‘lardan xalos bo‘lishga yordam beradigan nonushtabop mahsulotlar nomini sanab o‘tdi.
Nonushta kunning eng muhim taomi ekani ko‘pchilikka ma’lum. Ertalab nonushta qilishni afzal ko‘rasizmi, kunning birinchi qismida nima iste’mol qilinsa, kunning qolgan qismida energiya bilan ta’minlashga yordam beradi. Nonushta nosog‘lom gazaklardan qutqaradi va sport yoki mashaqqatli ishlar uchun quvvat beradi. Aytgancha, quyida sanab o‘tilgan mahsulotlarni nafaqat ertalab iste’mol qilish mumkin, balki ular har doim ham organizmga ijobiy ta’sir ko‘rsatmaydigan boshqa mashhur ertalabki taomlarga ajoyib alternativ hisoblanadi.
Losos balig‘i
Losos balig‘i odatdagi nonushtada bo‘lishining yaxshi sababi bor. Yog‘li baliq — bu sog‘lom yog‘lar manbasining ajoyib namunasi bo‘lib, u organizmni juda yuqori kaloriyasiz to‘ydiradi. Bundan tashqari, losos organizmni oqsil va omega-3 yog‘ kislotalari bilan ta’minlaydi, bu esa yurak-qon tomir kasalliklarini rivojlanish xavfini kamaytiradi. Baliq ham yod manbai bo‘lib, metabolizmni mukammal holatda saqlashga yordam beradi.
Tuxum
Tuxum oqsilga boy, ya’ni ular uzoq vaqt to‘qlik hissini beradi. Ba’zi parhezlar tuxum sarig‘idan tiyilishni tavsiya qiladi va bunday usullarning tarafdorlari tuxumning sarig‘i yog‘li qism ekanidan qo‘rqib, faqat oqsilni iste’mol qiladi, ammo aynan sariq qismda tuxumning eng foydali xususiyatlari mavjud. Bundan tashqari, mahsulotning yog‘ miqdori vaznga darhol ta’sir qiladi, degan fikr yanglish qarashdir. Yog‘larning har xil turlari mavjud va ularning ba’zilari “sog‘lom yog‘lar” deb ataladi. Tuxum tarkibida sog‘lom yog‘lar mavjud bo‘lib, ular nafaqat umumiy salomatlikni yaxshilaydi, balki tezroq to‘qlikni his qilishga yordam beradi. Agar maqsadingiz vazn yo‘qotish bo‘lsa, to‘yingan yog‘lardan saqlanish lozim.
Olma
Olimlar har doim juda qiyin ish hisoblangan yog‘ni erituvchi meva mavjudligini aniqladi. Oddiy olma beldagi qo‘shimcha santimetr va metabolik kasalliklar bilan kurashadi. Hammasi yog‘ning hujayralar tomonidan so‘rilishini cheklaydigan pektin tufayli yuz beradi.
Greypfruit
Greypfruitlar ko‘pincha vazn yo‘qotish parheziga kiradi. Nordon sitrus mevalari hamma uchun emas, lekin ular kerakli qomatga tezroq erishishga yordam beradi. Bir tadqiqot shuni ko‘rsatdiki, ovqatdan oldin greypfruit iste’mol qilish ishtirokchilarni kamroq ovqat iste’mol qilishga majbur qiladi. Ertalabki nonushtaga ushbu mevani qo‘shish tavsiya etiladi, bu organizmga shakarning so‘rilishini sekinlashtiradigan foydali elementlarni beradi.
Chia urug‘lari
Chia urug‘ining foydalari tufayli u super mahsulot deb nomlangan. Urug‘da nihoyatda ko‘p kletchatka bor, ya’ni chia iste’mol qilganda ko‘p suvni o‘zlashtiradi va ular oshqozonda gelga o‘xshash moddaga aylanadi, bu uzoq vaqt to‘qlik hissini uyg‘otadi. Bu ajoyib urug‘larni smetana, bo‘tqa, salat va pudingga qo‘shish mumkin. Uni tayyorlash uchun uch yoki to‘rt osh qoshiq chia urug‘i, 250 gramm o‘simlik suti va mevalar kerak bo‘ladi. Kechasi tayyorlangan pudingni tongda nonushtaga iste’mol qilish tavsya etiladi.
Izoh (0)