Ilon Maskning boyligi 2022-yilda 100 mlrd dollarga kamaydi

Dunyoning eng boy odami Ilon Maskning 2022-yildagi zarari 100 milliard dollardan oshdi. Bu haqda Bloomberg xabar bermoqda.

Maskning bu darajada ko‘p boylik yo‘qotishiga Tesla kompaniyasi aksiyalari ikki yil ichida eng past darajaga tushib ketgani sabab bo‘lgan. 

Bloomberg Billionaires Index ma’lumotlariga ko‘ra, Tesla asoschisi dushanba, 21-noyabr kuni boyligi 8,6 milliard dollarga qisqarganidan keyin ham 169,8 milliard dollar boyligi bilan dunyodagi eng boy odam bo‘lib turibdi. 

Maskning boyligi bir yil oldin 340 milliard dollargacha ko‘paygan edi. 2022-yilning o‘zida esa 100,5 milliard dollar yo‘qotgan. 

Tesla AQSHdan tashqaridagi eng yirik bozori bo‘lgan Xitoyda kuchayayotgan COVID bilan bog‘liq cheklovlar bilan kurashmoqda. 

Yaqinda Texas’ning Ostin shahrida joylashgan firma 300 mingdan ortiq avtomobilni orqa chiroqlari nosozligi sababli chaqirib olishini e’lon qildi.

Dushanba kuni Nyu-York savdolarida Tesla aksiyalari 6,8 foizga tushib, 167,87 dollargacha pasaydi. Bu 2020-yil noyabridan beri eng past ko‘rsatkichdir va joriy yilda 52 foizga pasaydi.

51 yoshli Mask o‘tgan oy 44 milliard dollarga Twitter’ni sotib olgan edi. U ijtimoiy tarmoqni sotib olgandan beri kompaniya taxminan 60 foiz xodimini yo‘qotdi.