AQSH so‘nggi yillarda Suriyadagi kurd jangarilariga o‘q-dorilar ortilgan minglab yuklarni yetkazib bergan, deb yozmoqda Anadolu Turkiya prezidenti Rajab Toyyib Erdo‘g‘onga tayanib.
“Biz Turkiyaning NATOdagi ittifoqchisi (AQSH) so‘nggi yillarda Suriyaning terrorchilar harakat olib borayotgan hududlariga o‘q-dori va qurol ortilgan minglab yuklarni yuborganidan qayg‘udamiz”, — dedi Erdo‘g‘on.
Prezident “bu kurs Barak Obama prezidentligidan beri davom etayotgani, Donald Tramp davrida ham davom etib, Jo Bayden davrida o‘zgarishsiz qolayotganini” ta’kidladi.
Turkiya rahbarining so‘zlariga ko‘ra, Anqara Vashingtonga Suriya muammosi yuzasidan o‘z xavotirini bildirgan.
“Men shaxsan Obama, Tramp va yana Bayden bilan suhbatlar chog‘ida bu masalani ko‘targanman, agar biz NATO ittifoqchisi va hamkorlar bo‘lsak, amerikaliklar tomonidan Suriyadagi terrorchilarga ko‘rsatilayotgan yordam Turkiyaning janubiy chegaralariga xavf tug‘dirishini tushunishimiz kerakligini aytganman. Kerak bo‘lsa, javob harakatlarini amalga oshirishga majbur bo‘lishimiz haqida ogohlantirganman”, — dedi Erdo‘g‘on.
Uning so‘zlariga ko‘ra, Amerika tomoni Anqaraga hech qanday javob bermayapti.
“Turkiya milliy xavfsizligi talabi bo‘yicha ish ko‘rishda davom etamiz. Hech qanday yon berish yo‘q! Chunki har qanday pozitsiya o‘zgarishi mamlakatimiz uchun muammolar yog‘diradi”, — deb ta’kidladi Erdo‘g‘on.
Avvalroq Turkiya Mudofaa vazirligi Suriya va Iroq shimolidagi kurd tuzilmalariga qarshi “Tirnoq-qilich” havo operatsiyasi boshlangani haqida xabar bergan edi. Vazirlik ma’lumotlariga ko‘ra, terrorchilar Turkiyaga hujum qilish uchun ushbu davlatlarning shimoliy hududlaridan baza sifatida foydalanmoqda.
Izoh (0)