Qalqonsimon bezni har kim o‘z uyida tekshirib ko‘rishi mumkin. Ammo buni qanday qilib to‘g‘ri amalga oshirishni hamma ham bilmaydi. Qalqonsimon bez organizmda juda katta rol o‘ynaydi, agar uning faoliyatida kamchilik bo‘lsa, jiddiy oqibatlar yuzaga keladi. Shuning uchun qalqonsimon bezni tekshirish ko‘nikmalarini uyda ham sinab ko‘rish tavsiya etiladi, deb yozadi Wday.
Qalqonsimon bezni qanday tashqi belgilar bilan tekshirish mumkin?
Organ faoliyatida biror muammo bo‘lsa, uning shakli kattalashadi va bo‘yin shakli o‘zgaradi. Alomatlar tashqi tomondan ham yaqqol ko‘zga tashlanadi. Qalqonsimon bezning patologiyalarida bo‘yin shakli eniga kengayib, terida burmalar va shish paydo bo‘ladi.
To‘g‘ri, faqat shifokor qalqonsimon bezni to‘g‘ri aniqlashi mumkin. Uy sharoitida esa barmoqlar kekirdak mintaqasida bo‘yin yuzasiga qo‘yiladi va bir marotaba yutqinish kerak. Odatda palpatsiyada og‘riq, biror shakl yoki qattiq joy sezilmasligi lozim.
Qalqonsimon bez kasalliklarining bilvosita belgilari:
- vazn va ishtaha o‘rtasidagi nomuvofiqlik, qancha ko‘p ovqat iste’mol qilinsa ham vazn ortmasligi;
- xarakterdagi o‘zgarish, asabiylashish yoki apatiyaning paydo bo‘lishi;
- surunkali charchoq;
- tana haroratining 37 dan 37,5 darajagacha uzoq muddatli ko‘tarilishi;
- ovoz tembrining pasayishi, xirillash;
- tez-tez sababsiz tomoq og‘rig‘i;
- hayz davrining buzilishi;
- qo‘l titrashi;
- teri qurishi;
- soch to‘kilishi.
Yod tanqisligi uchun tekshiruvdan o‘tish lozim. Ushbu moddaning yetishmasligi tufayli qalqonsimon bez kattalashadi. Buning uchun bilakka yod bilan 5×5 sm o‘lchamdagi panjara chiziladi. Agar ikki soatdan keyin yozuv yo‘qolsa, demak, organizmda yod yetishmovchiligi mavjud.
Qalqonsimon bez kasalliklari ko‘pincha yod tanqisligi yoki genetik moyilligi bo‘lgan odamlarda paydo bo‘ladi. Agar qalqonsimon bez muammosi borligiga shubha paydo bo‘lsa, endokrinologga murojaat qilish lozim. Bu shunchaki tuyilganmi yoki aniq bir muammo bormi, faqat mutaxassis aniqlay oladi. Ushbu organni uyda davolab bo‘lmaydi. Tekshiruvdan o‘tgandan so‘ng shifokor tomonidan davolanish uchun ko‘rsatma beriladi.
Izoh (0)