Yevropada qish uchun gaz poygasi allaqachon boshlangan — WSJ
Bir qator Yevropa kompaniyalari suyultirilgan gaz (LNG) eksportchilari bilan kelgusi yillar uchun yonilg‘i sotib olish bo‘yicha muzokaralarni boshladi. Bu haqda The Wall Street Journal manbalarga tayanib xabar berdi.
Nashrning yozishicha, Yevropa Ittifoqi gaz omborlari qariyb 95 foizga to‘lgan va ko‘plab tahlilchilarning fikricha, qit’a bu qishda energiya falokatidan qutula oladi.
Biroq Rossiya yetkazib berishdan uzilib qolgani va cheklangan LNG yetkazib berish bo‘yicha global raqobat kuchayib borayotgani inobatga olinsa, Yevropa davlatlari kelayotgan qishda yonilg‘i sotib olishda qiynaladi.
Mutaxassislarning prognozlariga ko‘ra, 2026-yilga kelib qo‘shimcha LNG paydo bo‘ladi. Nashrning ta’kidlashicha, Germaniyadagi ko‘plab kompaniyalar o‘n yillikning ikkinchi yarmida yuzaga kelishi mumkin bo‘lgan energiya tanqisligidan xavotirda.
Ular so‘nggi haftalarda AQSH va boshqa LNG ishlab chiqaruvchilari bilan o‘n yillikning o‘rtalaridan keyin boshlanishi mumkin bo‘lgan yetkazib berish bo‘yicha kelishuvlar haqida muzokaralar olib borishgan.
Yevropada ko‘pchilik 5-10 yillik yetkazib berish bo‘yicha shartnomalar tuzishni maqsad qilgan bo‘lsa-da, ba’zi kompaniyalar va amaldorlarni uzoq muddatli shartnomalar qiziqtirmayotgani muzokaralarni murakkablashtirmoqda.
Germaniya va Yevropaning boshqa davlatlari qazib olinadigan energiya manbalaridan foydalanishni sezilarli darajada qisqartirishni maqsad qilib qo‘ygan.
Shuning uchun kompaniyalar kerak bo‘lmaydigan gaz tufayli qiyin ahvolga tushib qolishdan qo‘rqmoqda, deb yozadi gazeta.
Avvalroq Rossiya va Xitoy energiya ta’minoti uchun milliy valyutalarda to‘lashga o‘tayotgani haqida xabar berilgan edi.
