Rasman: Karim Benzema JCH—2022 ni o‘tkazib yuboradi

Fransiya terma jamoasi hujumchisi Karim Benzema Jahon Chempionatini o‘tkazib yuboradi. Bu haqda Fransiya terma jamoasi matbuot xizmati ma’lum qildi.

“Real” forvardi terma jamoa mashg‘ulotlari vaqtida chap sonidan jarohat olgan. Qayd etilishicha, Benzema Dohada MRT tekshiruvidan o‘tgan va unda ushbu jarohat qayd etilgan. Tiklanish uch hafta vaqt olishi ta’kidlangan.

“Oltin to‘p”ning amaldagi sohibi La Liga joriy mavsumida 7 ta o‘yin o‘tkazib, beshta gol urdi.

Avvalroq Fransiya hujumchisi Kristofer Nkunku mashg‘ulotlarda jarohat olib, mundialda ishtirok eta olmasligi ma’lum bo‘lgandi. Shuningdek, Mayk Menyan, Presnel Kimpembe, Pol Pogba va Ngolo Kante kabi futbolchilar jarohat sabab Fransiyaga JCH—2022 da yordam berolmaydi.