Human Rights Watch tashkiloti Turkiya muntazam ravishda o‘n minglab afg‘on muhojirlarini mamlakatning Eron bilan chegarasidan chiqarayotgani yoki ularni to‘g‘ridan to‘g‘ri Afg'onistonga qaytarib yuborayotganini ma’lum qildi. Bu haqda Hasht-e Subh Daily xabar berdi.
Tashkilot hisobotiga ko‘ra, Turkiya “Tolibon” Afg‘onistonni egallab olganidan so‘ng afg‘on muhojirlarini mamlakatdan haydashni kuchaytirgan. Human Rights Watch Turkiya bir qator Afg‘oniston fuqarolarining Birlashgan Millatlar Tashkiloti idorasida ro‘yxatdan o‘tishlariga to‘sqinlik qilganini aniqladi.
“Turkiya tez-tez deportatsiya qilinishi kutilayotgan afg‘on muhojirlariga boshpana so‘rash imkoniyatini bermaydi”, deyiladi hisobotda.
Turkiya Ichki ishlar vazirligining Immigratsiya boshqarmasi mamlakatga kirishiga to‘siq qo‘yilgan 238 ming 448 nafar noqonuniy muhojirning aksariyati Afg‘oniston fuqarolari ekanini ma’lum qildi. Turkiya so‘nggi sakkiz oy ichida Kobulga 44 768 nafar afg‘on qochqinini samolyotda jo‘natgani, bu Human Rights Watch ma’lumotlariga ko‘ra, 2021-yilga nisbatan 150 foizga ko‘pligi qayd etildi.
Tashkilot muhojirlarni siqib chiqarish Inson huquqlari bo‘yicha Yevropa konvensiyasi, Fuqarolik va siyosiy huquqlar to‘g‘risidagi xalqaro pakt va 1951 yildagi Qochqinlar to‘g‘risidagi konvensiya bilan taqiqlanishini bildirdi.
Avvalroq BMT Tojikiston hukumatini afg‘onlarni deportatsiya qilishni to‘xtatishga chaqirgandi. Tashkilot qochqinlarning majburiy qaytarilishi qonunga va qochqinlar bo‘yicha xalqaro huquqning asosiy tamoyiliga zid ekanini eslatdi.
Izoh (0)