Bugun, 17-noyabr kuni O‘zbekiston prezidentining “Iste’mol bozorlarida narxlar barqarorligini ta’minlashga doir qo‘shimcha chora-tadbirlar to‘g‘risida”gi farmoni qabul qilindi.
Ta’kidlanishicha, farmondan asosiy maqsad aholini ijtimoiy ahamiyatga ega mahsulotlar bilan ta’minlash hamda ichki bozorda oziq-ovqat mahsulotlari narxi oshib ketishining oldini olishdir.
Farmonga ko‘ra, 2022-yil 1-iyundagi belgilangan bir qancha imtiyozlar 2023-yil 1-yanvardan 2023-yil 1-iyulga qadar uzaytiriladi.
Imtiyozlar orasida 23 turdagi birlamchi oziq-ovqat mahsulotlari uchun import bojxona bojining nol stavkalarini qo‘llash, savdo-iqtisodiy munosabatlarda ayrim mamlakatlardan import qilinadigan oziq-ovqat mahsulotlariga bojxona bojining ikki baravar stavkasini qo‘llamaslik bor.
23 turdagi import boji bekor qilingan birlamchi oziq-ovqat mahsulotlari quyidagilardan iborat:
- go‘sht mahsulotlari;
- baliq;
- sut mahsulotlari;
- tuxum;
- mevalar;
- sitrus mevalar;
- o‘simlik yog‘i;
- bug‘doy uni va boshqa oziq-ovqat mahsulotlari.
Qayd etilishicha, 2022-yil 1-iyundagi farmon ortidan ayrim oziq-ovqat mahsulotlarining keskin oshib ketishining oldi olingan.
Jumladan:
- mol go‘shti (64,7 ming so‘mdan 67,5 ming so‘mga) 4 foizga (o‘tgan yilning shu davrida 11 foizga oshgan);
- qo‘y go‘shti (67,4 ming so‘mdan 71 ming so‘mga) 5 foizga (o‘tgan yilning shu davrida 9 foizga oshgan);
- tovuq go‘shti (25,1 ming so‘mdan 25,6 ming so‘mga) 2 foizga (o‘tgan yilning shu davrida 14 foizga oshgan);
- kungaboqar yog‘i (19,4 ming so‘mdan 21,2 ming so‘mga)
- 9 foizga (o‘tgan yilning shu davrida 32 foizga oshgan) oshgan.
Izoh (0)