Energiya narxlari oqibati: Buyuk Britaniyada inflyatsiya 41 yillik eng yuqori darajaga ko‘tarildi

Buyuk Britaniyada iste’mol narxlari indeksi yillik ko‘rsatkichda 11,1 foizga o‘sdi. Bu haqda Bloomberg xabar bermoqda. 

Mazkur ko‘rsatkich so‘nggi 41 yildagi eng yuqorisi bo‘lib va oktabr oyida inflyatsiyani 10,9 foiz darajasida kutgan Buyuk Britaniya Markaziy banki prognozlaridan yuqoridir. 

Elektr energiyasi narxlarining yuqorilashi inflyatsiyaning iyul oyida o‘rnatilgan avvalgi rekorddan oshib ketishiga sabab bo‘ldi. Oktabr oyida gaz narxi deyarli 36,9 foizga, elektr energiyasi esa 16,9 foizga oshgan.

Iqtisodchilarning qayd etishicha, Buyuk Britaniyada ish haqi o‘sishi shu paytgacha narxlar o‘sishidan orqada qolgan, bu esa turmush darajasining pasayishiga olib kelgan. 

Kam ta’minlangan uy xo‘jaliklari uchun inflyatsiya darajasi 11,9 foizni tashkil etdi. Badavlat oilalarda esa bu ko‘rsatkich 10,5 foiz bo‘lgan.

Avvalroq Buyuk Britaniyada yuqori inflyatsiya tufayli minglab dorixonalar yopilishi mumkinligi haqida xabar berilgan edi.