Fransiya aql bilan to‘g‘ri yo‘l tutsagina, Rossiya u bilan munosabatlarini normallashtiradi. Bu haqda Rossiyaning Fransiyadagi elchisi Aleksey Meshkovga tayanib, “Gazeta.ru” xabar berdi.
Elchining so‘zlariga ko‘ra, ikki davlat munosabatlar tarixidagi eng yaxshi davrni boshdan kechirmayapti.
“Albatta, bu borada ijobiy tomondan gapirishning imkoni yo‘q. Lekin Moskva, jumladan, tashqi ishlar vaziri Sergey Lavrov bir necha bor ta’kidlaganidek, agar sheriklarimiz aql yo‘liga qaytsa, biz ular bilan gaplashishga tayyormiz”, — dedi Meshkov.
U Fransiyaning Rossiyaga qarshi aniq va qat’iy pozitsiyasi tufayli munosabatlarning hozirgi holati past darajada ekanligiga e’tibor qaratdi. Diplomat, shuningdek, Parij Ukrainaga “Sezar” gaubitsalarini yetkazib berishda davom etayotgani, bu qurollar orqali Donbassdagi tinch aholi o‘qqa tutilayotganini aytdi.
“Fransiya va Germaniya Normandiya formatida ishlash imkoniyatiga ega edi. Afsuski, ular kerakli harakatlarni bajarmadi. Bugungi kunga qadar bunday urinishlar bo‘lmagan. Boshqa tomonda, g‘alla kelishuvi va Zaporojye atom elektr stansiyasining xavfsizligi bo‘yicha suhbat ketmoqda”, — deya xulosa qildi rus diplomati.
10-noyabr kuni fransiyalik siyosatchi Zelenskiy rejimini moliyalashtirishni to‘xtatishga chaqirdi. Rossiya Ukrainaga bostirib kirgandan buyon Fransiya va boshqa G‘arb davlatlari Ukraina Qurolli kuchlarini milliardlab dollarlik qurol-yarog‘ bilan ta’minladi. Parij allaqachon Kiyevga 18 ta CAESAR 155mm o‘ziyurar artilleriya moslamalarini yuborgan.
Bundan tashqari, Fransiya prezidenti Emmanuel Makron mamlakat rasmiylari Daniya bilan birgalikda Ukrainaga yana oltita xuddi shunday gaubitsa yetkazib berish ustida ish olib borayotganini aytdi. Parij, shuningdek, Kiyevga radarlar, havo hujumidan mudofaa tizimlari va raketalarni yetkazib berishni rejalashtirmoqda.
Izoh (0)