Rossiya Tashqi ishlar vazirligi AQSHning 200 nafar fuqarosiga qarshi shaxsiy sanksiyalar joriy qildi. Vazirlik saytida ularning ro‘yxati e’lon qilindi.
TIV bayonotiga ko‘ra, Rossiya “AQSH prezidenti ma’muriyati tomonidan nafaqat Rossiya rasmiylari, ishbilarmon doira vakillari, madaniyat arboblariga, balki u yoki bu sabablarga ko‘ra Vashingtonga e’tiroz bildiruvchi shaxslarga nisbatan qo‘llayotgan shaxsiy sanksiyalarga javoban” sanksiyalar joriy qilmoqda.
Ro‘yxatga hokimiyat va qonunchilarning alohida vakillari, ularning yaqin qarindoshi, harbiy-sanoat kompaniyalari va korxonalari rahbarlari, “rusofobiya” kampaniyasini targ‘ib qilish va “Kiyev rejimini” qo‘llab-quvvatlashda ishtirok etgan ekspertlar kiritilgan.
Sanksiya kiritilgan shaxslar orasida AQSH prezidenti Jo Baydenning singlisi va ukalari, Oq uy matbuot kotibi, AQSH mudofaa vaziri o'rinbosari, ta’lim vaziri, senatorlar va ularning rafiqalari, jurnalist hamda professorlar ham bor.
Fevral oxiridan buyon AQSH, Yevroittifoq, Buyuk Britaniya va boshqa bir qator mamlakatlar Rossiyaga qarshi sanksiyalarning bir nechta paketini kiritdi. Cheklovlar siyosiy elita, biznesmenlar, ko‘mir va neft yetkazib berish, sanoat, bank sektori va iqtisodiyotning boshqa sohalariga tegishli bo‘ldi.
Rossiya hukumati bir tomonlama cheklov choralarining noqonuniyligini bir necha marta aytib o‘tgan, shuningdek, ular cheklovlarni kiritgan mamlakatlarning iqtisodiyotiga jiddiy salbiy ta’sir o‘tkazishini ta’kidlagandi. Xususan, prezident Vladimir Putin Yevroittifoq Rossiyaga qarshi sanksiyalardan ko‘radigan ehtimoliy talafotni 400 milliard dollarga baholagan edi.
Izoh (0)