Ko‘pchilik afsonaviy ertaklarning faqat birgina ekranlashtirilgan versiyasini tomosha qilgan. Aslida esa ertak qahramonlari boshqa mamlakatlarda boshqacha tasvirlangan kartinalar yetarlicha topiladi.
Pinokkio
Pinokkio rejissyor va animatorlarning eng sevimli qahramonlaridan biri, chunki u haqida ko‘plab badiiy va animatsion filmlar suratga olingan. 1976 yildan 1977 yilgacha Yaponiyada “Pikkolinoning sarguzashtlari” seriali namoyish etiladi. 2019-yilda italiyalik rejissor Matteo Garrone “Pinokkio” filmini suratga oladi, oradan 3 yil o‘tib Robert Zemekkisning shu nomdagi kartinasi ekranlarga chiqadi.
Maugli
1967-yilda Amerikaning Walt Disney studiyasi “Jungli kitobi” multfilmini namoyish etdi. Mazkur kartina Uolt Disneyning o‘zi ishlab chiqargan so‘nggi filmi va uning o‘limidan keyin chiqarilgan birinchi animatsion film bo‘ldi. 1989-yildan 1990-yilgacha Yaponiyada “Jungli kitobi: Mauglining sarguzashtlari” animatsion seriali chiqdi.
Qarsildoq
Ernst Teodor Amadeus Xoffmanning “Qarsildoq” haqidagi sevimli Rojdestvo ertagi ham bir necha bor suratga olingan. 2010-yillarning o‘rtalarida ushbu asarning kamida 2 ta varianti chiqdi. 2015-yilda Germaniyada “Qarsildoq va sichqonlar qiroli” filmi, xuddi shu yili Peruda “Qarsildoqning sehrli qirolligi” filmi ham namoyish etildi.
Uyqudagi malika
“Uyqudagi malika” uzoq vaqtdan beri turli mamlakatlarda bir necha marta suratga olingan klassika bo‘lib kelgan. Chexoslovakiyada 1978 yilda suratga olingan “Malikani qanday uyg‘otish kerak” kartinasi mashhur bo‘ldi. Germaniyada, shuningdek, “Uyqudagi malika” (2009) deb nomlangan ertakning o‘ziga xos filmi mavjud. Qo‘shma Shtatlar ham o‘z versiyasi bilan maqtanishi mumkin — 2016-yilda “Lan’atlangan uyqudagi malika” kartinasi chiqarilgan.
Bell
“Sohibjamol va maxluq” butun dunyoda mashhur bo‘lgan yana bir ertak bo‘lib, u ham kinoijodkorlar e’tiboridan chetda qolmagan. U ilk bor 1740-yilda fransuz yozuvchisi Gabriela Suzanne Barbo de Villnyov tomonidan yaratilgan. 2010-yilda Bel va maxluq sevgisi haqidagi (“Sohibjamol va maxluq”) filmining Avstraliya tomonidan ishlangan versiyasi chiqdi. 4 yil o‘tgach, xuddi shu nom ostida ertakning fransuz filmiga moslashuvi, 2017-yilda esa AQSHniki chiqdi. Amerika filmidagi Bell rolini Emma Uotson ajoyib tarzda gavdalantirgan.
Piter Pen
Piter Pen 20-asr bolalar adabiyotidagi eng mashhur qahramonlardan biri. Uning yaratuvchisi shotland yozuvchisi va dramaturgi J. M. Barri hisoblanadi. Bu bolakay haqidagi hikoya birinchi marta 1924-yilda suratga olingan. “Piter va Vendi” (2015) — Piter Pen bosh qahramonga aylangan filmlardan biri. “Ertaklar olamida” serialida esa bu obrazga salbiy bo‘yoq berilgan.
Zolushka
Zolushka ko‘plab mamlakatlarda eng sevimli ertaklardan biridir. U asosan aka-uka Grimmlar, Sharl Perro va Jambattista Bazile nashrlari bilan tanish. Umuman olganda, ushbu asarning 100 dan ortiq varianti ma’lum. Masalan, Chexiya versiyasi — “Zolushka uchun uch yong‘oq” (1973), Britaniya versiyasi — “Tufli va atirgul” (1976), Amerika versiyasi — “Zolushka” (2015) va Norvegiyaning yangi variant ham — “Zolushka uchun uch yong‘oq” (2021) deb nomlangan.
Olouddin
“Ming bir kecha” ertagi dunyoga Olouddindek qahramonni hadya etdi, u ham hech qachon kino ijodkorlar e’tiboridan chetda qolmagan. 2009-yilda tomoshabinlar hindistonlik Olouddinni “Olouddin” komedik filmida ko‘rishdi. Biroq Gay Richi tomonidan yaratilgan amerikalik Olouddin (“Olouddin”, 2019)dan farqli o‘laroq, u kassada unchalik yaxshi natija bermadi.
Oppog‘oy
“Oppog‘oy” ertagi 1812-yilda aka-uka Grimmlar tomonidan nashr etilgan va 1854-yilda ular tomonidan qayta to‘ldirilgan. Yozuvchilar, musiqachilar, teatr rejissorlari va hatto kompyuter o‘yinlari yaratuvchilari ham bu ertakdan ilhomlangan. Shubhasiz, ushbu asarning filmga moslashuvining ajoyib versiyalaridan biri AQSHda suratga olingan “Oppog‘oy va yetti gnom” (1937)dir. Italiya va Yaponiyada ishlangan “Malika Oppog‘oy afsonasi” (1994-1995) animesi unchalik mashhur emas.
Izoh (0)