Ukraina prezidenti ofisi rahbari maslahatchisi Mixail Podolyak Reuters agentligiga bergan intervyusida Rossiya qo‘shinlarining Xersondan olib chiqilishi haqida gapirishga hali erta ekanligini aytdi.
“Xerson uzra Ukraina bayrog‘i hilpirab turmagunicha, Rossiya qo‘shinlarini olib chiqib ketish haqida gapirishning ma’nosi yo‘q”, — dedi maslahatchi.
Podolyakning aniqlik kiritishicha, hozircha Rossiya Xersonni jangsiz tark etish niyatida ekani haqida hech qanday alomat yo‘q, hududda rus guruhining muhim qismi qolmoqda, shaharga qo‘shimcha zaxiralar jalb qilinmoqda.
“Ukraina hududlarni razvedka ma’lumotlari yordamida ozod qilmoqda, televideniyening uyushtirilgan bayonotlari asosida emas”, - dedi u.
Ayni paytda uning hamkasbi Aleksey Arestovich dushmanning shaharni tark etishi haqida gapirish noto‘g‘ri ekanligini ta’kidladi.
9-noyabr kuni ertalab rossiyalik “harbiy muxbirlar” Xersondagi binolardan Rossiya bayroqlari olib tashlanganini, bosib olingan Snigirevkadan shahar tomon ketayotganda ko‘priklar portlatib yuborilganini xabar qildi.
Kechga yaqin Rossiya qo‘shinlar qo‘mondoni Sergey Surovikin askarlarni Dneprning o‘ng qirg‘og'idan olib chiqishni taklif qildi. Rossiya mudofaa vaziri Sergey Shoygu bu taklifga rozilik bildirdi.
Izoh (0)