Hammasi smartfon tufayli: 3000-yilga kelib odamlar qanday ko‘rinishda bo‘ladi?

Amerikaning TollFreeForwarding.com texnologik kompaniyasi ilmiy izlanishlar va ekspert xulosalarini to‘plaganidan so‘ng Mindy ismli kelajak odamining 3D modelini yaratdi.

Mindy 3000-yilga kelib smartfon, noutbuk va boshqa texnologiyalardan foydalanish tufayli sezilarli darajada o‘zgargan tanaga ega.

Tadqiqotchilarning ta’kidlashicha, tanadagi kattalashtirilgan o‘zgarishlar texnologiyadan ortiqcha foydalanishning jismoniy va aqliy zararini ko‘rsatadi. Tanadagi o‘zgarishlar quyidagicha namoyon bo‘ladi:

Bukrilik

Tadqiqotga ko‘ra, bukilgan bel — texnologiya olib kelishi mumkin bo‘lgan o‘zgarishlardan biridir. Telefon yoki kompyuter ekraniga qaraganda holat o‘zgaradi va tanaga ko‘proq bosim tushadi. Maple Holistics’ning sog‘liqni saqlash bo‘yicha mutaxassisi Kaleb Bakning ta’kidlashicha, telefonga egilib qarash umurtqa pog‘onasini muvozanatdan chiqaradi, bo‘yin muskullari esa boshni tutib turish uchun qo‘shimcha kuch sarflashi kerak.

“Matnli panja” (telefonni ushlaydigan qo‘l panjasi)

Tadqiqotga ko‘ra, Mindy ham “matn terishga moslashgan panja” deb ataladigan kasallikdan aziyat chekadi. Bu holat smartfonni ushlab, barmoqlarni uzoq vaqt davomida boshqacha holatda ishlatgandan so‘ng paydo bo‘ladi.

90 darajali tirsak

“Smartfon tirsagi” deb ham ataladigan 90 gradusli tirsak smartfonni juda uzoq vaqt ushlab turish natijasida yuzaga keladi. Ilmiy jihatdan, bu pozitsiya oqibatida nervlar cho‘ziladi va qo‘llarda zaiflik yuzaga keladi.

“Texnik bo‘yin” (siqilgan bo‘yin)

Texnologiyaning bo‘yinga ta’siri ham yangi holatga olib kelishi mumkin. Doktor C. Daniel Riou “Salomatlik masalalari” jurnalida chop etilgan maqolasida “texnik bo‘yin” nima ekanligini tushuntiradi:

Kompyuterda ishlaganingizda yoki telefonga qaraganingizda bo‘yinning orqa mushaklari boshni tutib turish uchun qisqarishi kerak. Qanchalik ko‘p pastga qarasangiz, boshingizni ko‘tarib turadigan mushaklarga shunchalik qiyin bo‘ladi. Bu mushaklar haddan tashqari zo‘riqish tufayli bosimga uchrashi mumkin.

TollFreeForwarding tadqiqoti shuni ko‘rsatadiki, Mindy smartfonning RF nurlanishining zararidan himoya qilish uchun katta bosh suyagiga ega. Kelajakda odamlarda ham shu kabi bosh suyagi ichida kichik miya bo‘ladi.

Ko‘zning ikkinchi qovog‘i

Bosh og‘rig‘i, ko‘z zo‘riqishi va ko‘rlik yuzaga kelmasligi uchun Mindy ortiqcha yorug‘lik ta’sirini oldini olish maqsadida kengaytirilgan ichki ko‘z qovog‘iga ega bo‘ladi.