Xonanda Selena Gomes shifokorlar bipolyar depressiya tashxisini qo‘ygunga qadar uzoq vaqt davomida ruhiy muammolardan aziyat chekdi. Dori-darmonlarni qabul qilishni boshlagandan keyin 30 yashar qo‘shiqchi o‘zini yengil his qildi va ruhiy holatini sezilarli darajada yaxshiladi.
Ammo ma’lum bo‘lishicha, ijrochidagi kasallikni yengishga yordam beradigan dori vositalari uning organizmiga salbiy ta’sir ko‘rsatadi, deb yozadi Grazia.
Selena Gomes Rolling Stone jurnaliga bergan intervyusida bu haqda ochiq gapirdi. Uning so‘zlariga ko‘ra, homiladorlik davrida bipolyar depressiya uchun dori-darmonlarni qabul qilish tug‘ilajak bolada nuqsonlar xavfini oshiradi, shuning uchun unga farzand ko‘rish mumkin emas.
Shunga qaramay, xonanda hali ham ona bo‘lishni rejalashtirmoqda. “Men farzandli bo‘lishni xohlayman. Va bo‘laman ham”, — deya qo‘shimcha qilgan u.
Shuningdek, Gomes hayotidagi eng dahshatli davrning ba’zi tafsilotlari bilan o‘rtoqlashdi.
Ma’lum bo‘lishicha, bundan to‘rt yil oldin qo‘shiqchi turli xil ovozlarni eshitgan va o‘z joniga qasd qilmoqchi bo‘lgan, shundan so‘ng unga paranoyya (biror yomon narsa sodir bo‘lishidan qo‘rqish, xadiksirash) tashxisi qo‘yilgan.
U sog‘ayishi uchun 4 ta psixiatriya klinikasiga yotqizilgan. O‘sha davrdagi voqealarning asosiy qismi davolanish jarayonida uning xotirasidan o‘chib ketgan. “Mensiz dunyo yanada yaxshi bo‘ladi, deb o‘yladim. Bipolyar buzuqlikni qabul qilish va u bilan qanday kurashishni o‘rganish uchun o‘z ustimda ko‘p mehnat qildim, chunki u yo‘q bo‘lib ketmaydi”, — dedi Selena.
Xonandaning ruhiy salomatligi yomonlashishiga asosiy sabablardan biri uning amalga oshmagan orzulari edi: “Men 25 yoshimda turmushga chiqaman, deb orzu qilganman. Men o‘sha yoshda oilali bo‘lishga tayyor bo‘lish tugul, hatto bunga yaqin ham emasdim. Bu juda ahmoqlik, lekin haqiqatan ham o‘shanda men uchun dunyo quladi, deb o‘ylaganman”.
Izoh (0)