Xabaringiz bor, 2022-yilning 3—4-noyabr kunlari Samarqandda O‘zbekistonning ikkinchi iqtisodiy forumi bo‘lib o‘tmoqda.
Ushbu forumdagi mingdan ortiq mehmonlar orasida dunyoning rivojlangan mamlakatlaridan yetakchi xalqaro iqtisodchilar, nufuzli investorlar, ekspertlar, O‘zbekiston vazirlik va idoralari rahbarlari ishtirok etmoqda.
Bugun anjumanning ikkinchi kuni doirasida “Moliyaviy bozorni rivojlantirish: vositalar va maqsadlar” mavzusidagi davra suhbati bo‘lib o‘tdi.
Bunda O‘zbekiston Markaziy banki raisi o‘rinbosari Behzod Hamroyev, Respublika fond birjasi raisi Georgiy Paresishvili, Yevropa tiklanish va taraqqiyot bankining boshqaruvchi direktori Aksel van Pederveyen, Osiyo taraqqiyot banki g‘aznachiligi rahbari o‘rinbosari Jonathan Grosvenor va boshqalar ishtirok etdi.
Suhbatda qayd etilishicha, so‘mda qarz olishning ko‘payishi xorijiy valyutalarga bog‘liqlikni va valyuta kurslarining o‘zgarishi xavfini kamaytirishga imkon beradi.
Ta’kidlanishicha, Toshkent respublika fond birjasida IPO orqali yirik davlat korxonalari va banklarini xususiylashtirish vazifalariga erishish uchun ushbu sohani yanada rivojlantirish zarur.
Shuningdek, forum paytida “Daryo” muxbiri bilan suhbatlashgan “Ozavtosanot” boshqaruv raisi o‘rinbosari Azizbek Shukurov IPO masalasiga ham to‘xtalib o‘tdi:
Bugun ham yana bir bor xorijiy investorlarga UzAuto Motors IPO’sini prezentatsiya qilib berdik. Fikrimizcha qiziqish yaxshi. Xorijiy investorlardan ham, mahalliy investorlardan ham. Yil oxirigacha yirik davlat korxonalari ichida birinchi bo‘lib IPO’ni chiqarmoqchimiz.
Panel sessiyasida esa ekspertlar kelgusi besh yil ichida bozor munosabatlariga mos keladigan moliyaviy tizimni yaratish yuzasidan fikr almashdi.
Bundan tashqari bank sohasida transformatsiya jarayonlarini yakunlash, xususiy sektor ulushini 60 foizgacha oshirish va raqobatbardosh bank operatsiyalari uchun sharoit yaratish ham muhoka qilindi.
Izoh (0)