UzAuto UzSungwoo zavodi negizida qiymati 10 mln dollarga teng zamonaviy metalni termik qayta ishlash sexini ishga tushirdi

UzSungwoo zavodida Markaziy Osiyodagi yagona qaynoq shtamplash yo‘li bilan to‘liq avtomatlashtirilgan metalni qayta ishlash sexini tashkillashtirish Chevrolet Tracker va Onix modellari uchun qiymati 19 mln dollarga teng 20 turdagi butlovchi qismlarni mahalliylashtirish imkonini beradi. Yangi liniyani ishga tushirish natijasida UzSungwoo yillik ishlab chiqarish hajmi 95 mln dollarga yetadi.

Loyiha davlatimiz rahbari Shavkat Mirziyoyevning Respublikada ishlab chiqarishni rivojlantirishning samarali tizimini yaratish va sanoat kooperatsiyasini kengaytirish bo‘yicha qo‘yilgan topshiriqlar doirasida “O‘zavtosanoat” AJ tomonidan amalga oshirildi. “O‘zavtosanoat”ning UzSungwoo MCHJ QKning ishlab chiqarish quvvatlarida qiymati 10 mln dollarga teng “Metallni issiqlik bilan qayta ishlash” loyihasining amalga oshirilishi bugungi kunda yangi mahsulotlarni ishlab chiqarish va iqtisodiyot tarmoqlari bo‘yicha mavjud quvvatlarni kengaytirish borasidagi loyihalar qatoridan joy oldi.

Eng yangi texnologiyalar asosida loyihalashtirilgan UzSungwoo metalni issiqlik bilan qayta ishlash yangi liniyasi Schuler, Prima Power, Benteler va Aotto kabi dunyoning yetakchi ishlab chiqaruvchilari kompaniyalarining metalni kesish, qaynoq presslash va lazerda kesish uskunalari bilan jihozlangan. Korxonada yangi liniya ishga tushirilishi natijasida qo‘shimcha 120 ta ish o‘rni yaratilib, 2,4 mln metall buyumni ishlab chiqarish ta’minlangan.

Iqtisodiyotni rivojlantirish bevosita ishlab chiqarishning o‘sishiga bog‘liq. O‘zbekistonda navbatdagi o‘ziga xos yuksak texnologik va ilmiy asosga ega ishlab chiqarishni tashkillashtirish, shubhasiz, milliy iqtisodiyotning raqobatbardoshligini oshirishga va eksportning barqaror o‘sishiga xizmat qiladi. Bundan tashqari, ilgari O‘zbekistonga import qilingan mahsulotni ishlab chiqarish imkoniyati boshqa sohalarda ham importni qisqartirish uchun sharoit yaratadi.

Avtomobilsozlik sanoatining ko‘p qirraliligini hisobga olib, aytish mumkinki, yangi ishlab chiqarish texnologiyalari yuqori darajali mutaxassislarga bo‘lgan talabni oshiradi va yosh avlodga ko‘plab yo‘nalishlar bo‘yicha sifatli ta’lim olish uchun rag‘bat vazifasini o‘taydi. Zamonaviy ishlab chiqarish, shuningdek, oliy toifali muhandislar sonining oshishi, texnika fanlari hamda xalqaro standartlarga muvofiq boshqaruv madaniyati rivojlanishiga turtki beradi.

Ta’kidlash kerakki, O‘zbekiston avtomobil sanoatida mustahkam o‘ringa ega UzSungwoo korxonasi, mana, 10 yildirki, yurtimizda ishlab chiqarilayotgan avtotransport vositalari, shuningdek, Rossiya, Meksika, Braziliya va Koreyadagi yirik avtozavodlar uchun 300 nomdagi shtapmlangan va payvandlangan butlovchi qismlarni yetkazib beradi.

Zavod UzAuto strukturasiga kiradi va 2012-yilda UzSungwoo ishga tushirilgan vaqtdan buyon 900 ga yaqin ish o‘rnini yaratib, 60 mln dollar atrofidagi investitsiyani jalb qilgan.

Reklama huquqi asosida.