Rossiya armiyasi frontda hujumlar sonini uch marta oshirdi

Rossiya armiyasi frontning alohida qismlarida jangovar harakatlar shiddatini sezilarli darajada oshirdi. Bu haqda Ukraina qurolli kuchlari bosh qo‘mondoni Valeriy Zalujniy NATO va AQSHning Yevropadagi birlashgan kuchlari komandiri Kristofer Kavoli bilan telefon suhbati chog‘ida ma’lum qildi.

“Frontdagi vaziyatni muhokama qildik. U keskin, lekin nazorat ostida bo‘lib qolmoqda, — deb yozdi Zalujniy o‘z Telegram-kanalida. — Dushman frontning alohida hududlarida jangovar harakatlar shiddatini uch karra — har kuni 80 ta hujumgacha oshirgan. Jangchilarimiz mardligi va mahorati sharofati bilan biz mudofaani ushlab turibmiz”.

Ukraina qurolli kuchlarining 4-noyabr kuni e’lon qilingan ertalabki hisobotida aytilishicha, Rossiya armiyasi hujum harakatlarini Baxmut, Avdeyevka va Novopavlovka yo‘nalishlariga qaratgan.

O‘tgan bir kecha-kunduzda Ukraina harbiylari Donetsk viloyatidagi bir qator aholi punktlarida Rossiya hujumlarini qaytarishga muvaffaq bo‘lgan. Rossiya armiyasi to‘qnashuv chizig‘i bo‘ylab Ukraina qurolli kuchlari bo‘linmalarini o‘qqa tutmoqda, aviarazvedka olib bormoqda, shuningdek, infratuzilma obyektlariga zarbalar berishda davom etmoqda, deyiladi ma’lumotnomada.

Ukraina qurolli kuchlari ma’lumotlariga ko‘ra, Rossiya harbiylari to‘rtta raketa va 28 ta aviazarbalar bergan, shuningdek, baravar o‘t ochish reaktiv tizimlaridan 45 martadan ko‘proq o‘q uzgan. Ushbu xatti-harakatlar oqibatida Zaporojye, Dnepropetrovsk, Donetsk, Xerson va boshqa viloyatlarda 30 dan ortiq aholi punktlari jabr ko‘rdi.