2022-yil 8-noyabr kuni Oy qizil tusga kiradi. Bunday holat Yer Quyosh va Oy oralig‘idan o‘tayotganida Yerning soyasi Oyni to‘sib qo‘yganida yuz beradi. Ushbu hodisa to‘liq Oy tutilishi deb ataladi. Bu haqda Starwalk xabar bermoqda.
To‘liq Oy tutilishi naq 85 daqiqa davom etishi kutilmoqda. Afsuski, bu tabiiy hodisani Yer sharining o‘sha vaqtda tun bo‘lgan qismlaridagina kuzatish mumkin bo‘ladi.
Oy tutilishi uchta bosqichda bo‘lib o‘tadi, bular — Oyning yarim, qisman va to‘liq tutilishi bosqichlaridir.
Eclipse Guide ilovasiga ko‘ra, O‘zbekistonda Oyning qisman tutilishi bosqichini ko‘rish mumkin bo‘ladi.
O‘zi umuman Oyning yarim tutilish bosqichi Toshkent vaqti bilan 13:02 da, to‘liq tutilish bosqichi esa 15:16 da boshlanadi. Bu fazalarni O‘zbekiston aholisi ko‘ra olmaydi. Biroq to‘liq Oy tutilishi 16:41 da tugab, yana qisman tutilish bosqichi boshlanganida, buni O‘zbekiston hududidan ko‘rish mumkin bo‘ladi. Qisman tutilish bosqichi 17:49 gacha davom etadi, so‘ng yarim tutilish bosqichi boshlanadi va 18:56 gacha davom etadi.
Demak, 8-noyabr kuni Toshkent vaqti bilan 16:41 dan 17:49 gacha bo‘lgan vaqt oralig‘ida Oy tutilishining qisman tutilish bosqichini ko‘rish mumkin bo‘ladi. Uni maxsus uskunalarsiz ham kuzatish mumkin bo‘ladi.
Bundan avvalgi to‘liq Oy tutilishi 16-mayga o‘tar kechasi yuz bergan, unga Shimoliy va Janubiy Amerika aholisining katta qismi guvoh bo‘lgan edi.
Izoh (0)