O‘zbekistonda standartlashtirish to‘g‘risida yangi qonun qabul qilindi

“Standartlashtirish to‘g‘risida”gi qonun 3-noyabr kuni prezident tomonidan imzolandi, deb xabar bermoqda Adliya vazirligining “Huquqiy axborot” Telegram-kanali.

Qonunga ko‘ra, O‘zbekistonning milliy standartlashtirish tizimini quyidagilar tashkil etadi:

• Investitsiyalar va tashqi savdo vazirligi huzuridagi O‘zbekiston texnik jihatdan tartibga solish agentligi;
• Standartlashtirish bo‘yicha milliy organ;
• davlat va xo‘jalik boshqaruvi organlari;
• standartlashtirish bo‘yicha texnik qo‘mitalar.

Standartlashtirishning asosiy vazifalaridan biri fuqarolarning hayotini, sog‘lig‘ini va mol-mulkini hamda atrof-muhitni muhofaza qilishdan iborat.

Standartlashtirish rejasi quyidagi muddatli istiqbol uchun qabul qilinishi mumkin:

• qisqa (1 yilgacha);
• o‘rta (1 yildan 5 yilgacha);
• uzoq (5 yildan 10 yilgacha).

Standartlarning yagona axborot bazasi Standartlashtirish bo‘yicha milliy organ tomonidan shakllantiriladi va yuritiladi. Standartlarning toifalari jumlasiga milliy standartlar, xalqaro (mintaqaviy) standartlar, xorijiy mamlakatlarning standartlari kiradi.

Qonun rasmiy e’lon qilingan kundan e’tiboran 12 oy o‘tgach kuchga kiradi.