O‘zbekistonda eng kam yillik mehnat ta’tili muddati uzaytirildi

O‘zbekistonning yangi tahrirdagi Mehnat kodeksida mеhnat ta’tilining eng kam muddati 21 kalendar kuni etib belgilandi.

Quyi palata matbuot xizmatining xabar qilishicha, unda xodimlar yillik asosiy ta’tili muddati davomiyligi ko‘paytirilib, xalqaro standartlarga muvofiqlashtirildi. Amaldagi Mehnat kodeksiga asosan, yillik asosiy ta’til muddati 15  ish kunini tashkil etadi. Yangi tartibga binoan, yillik asosiy mehnat ta’tili davomiyligi eng kam muddati 21 kalendar kuni etib belgilandi va xalqaro standartga muvofiqlashtirildi.

Kodeksda bandlik, individual mehnat munosabatlari, xodimlarni kasbga tayyorlash, qayta tayyorlash va malakasini oshirish, ayrim toifadagi xodimlar mehnatini tartibga solish xususiyatlari, xodimlar mehnat huquqlarini himoya qilish, mehnat nizolarini ko‘rib chiqish kabi normalar ham o‘z ifodasini topgan.

Ijtimoiy va huquqiy himoyaga muhtoj ishchilar ayrim toifalari — ayollar va oilaviy majburiyatlarni bajarish bilan shug‘ullanadigan shaxslar, 18 yoshga to‘lmagan ishchilar, nogironlar, o‘rindoshlik asosida ishlovchilar, yakka tartibdagi tadbirkorlar mehnatini tartibga solish o‘ziga xos xususiyatlari ham aks etgan.

Ish beruvchi homilador ayollarga birlamchi tibbiy-sanitariya yordami muassasalarida antenatal (tug‘uruqqacha) parvarishlash uchun o‘rtacha ish haqi saqlangan holda qo‘shimcha bo‘sh kunlarni berishi lozim bo‘ladi. Xodim ish stajiga qarab ishdan bo‘shatish nafaqasini tabaqalashtirish va bunda aynan ushbu tashkilotda ishlagan muddatini inobatga olish nazarda tutildi.

Mavzuga doir: 

• Mehnat shartnomasiga qanday shartlar kiritilsa, o‘z-o‘zidan haqiqiy hisoblanmasligi ma’lum qilindi
• O‘zbekistonda ishdan bo‘shatish nafaqasi miqdorini belgilash tartibi o‘zgaradi