Rossiya tarkibidagi Boshqirdiston respublikasi poytaxti Ufa shahrida to‘rt nafar mahalliy aholi guruh tarkibida terakt tashkillashtirishda ayblanib, hibsga olindi, deb xabar bermoqda “Kommersant” Ufaning Sovet tuman sudiga tayanib.
Hibsga olinganlar 17—18 yoshli yigitlar bo‘lib, ayblov versiyasiga ko‘ra, ular Rossiyaning Ukrainaga bostirib kirishiga qarshi chiqib, Boshqirdistonda hokimiyat organlari faoliyatini beqarorlashtirish maqsadida kamida besh marta temir yo‘ldagi elektr texnikasi uskunasiga zarar yetkazishga uringan.
Xususan, yigitlar Chernikovka — Shaksha stansiyalari oralig‘idagi ajratuvchi postga hamda Dema — Blokpost stansiyalari oralig‘ida boshqaruv punktiga va to‘rtta rele shkafiga o‘t qo‘ygan. 27-oktabr kuni ayblanuvchilarning ikki nafari Ufa temir yo‘lida ajratuvchi postni yoqib yuborishga urinish chog‘ida qo‘lga olingan.
Ayblanuvchilarning “VKontakte”dagi sahifalariga ko‘ra, ular Ufa o‘quv muassasalari talabalaridir. Ba’zi manbalar ulardan biri Tojikiston fuqarosi ekanini da’vo qilmoqda.
Ufalik talabalar ishini Rossiya Xavfsizlik kengashi raisi o‘rinbosari, mamlakat sobiq prezidenti va bosh vaziri Dmitriy Medvedev izohladi. U ayblanuvchilarni “chet ellik talabalar” va “yaramaslar” deb atadi, shuningdek, Ikkinchi jahon urushi davrida “sabotajchilar” (putur yetkazuvchilar, to‘sqinlik qiluvchilar) otib tashlanganini eslatdi.
“Zamonaviy Rossiyada o‘lim jazosiga moratoriy (taqiq) amal qiladi. Bu g‘oyatda insonparvarlik… Lekin, yana bir marta ta’kidlayman, hozirgi Konstitutsiya doirasida ham, Rossiya Konstitutsiyaviy sudi huquqiy pozitsiyasini o‘zgartirishda zarur bo‘lsa, o‘lim jazosiga nisbatan moratoriy yengib o‘tilishi mumkin. Bu odamlarimiz, davlat va jamiyat manfaatlarini himoya qilish vositasini tanlash masalasidir”, — deyiladi Medvedevning postida. U urush boshlanganidan keyin o‘lim jazosini qaytarish haqida ko‘p marta fikr bildirgan.
Ijtimoiy tarmoqlardagi profillari va suratlariga qaraganda, ayblanuvchilar bolaligidan buyon Ufada yashaydi va o‘qiydi. Ularning chet el fuqarolari ekani tasdiqlanganicha yo‘q.
Avvalroq boshqird millatchilari safarbarlikka javoban hamda respublikaning Rossiyadan ajralib chiqishi haqidagi shiorlar ostida qurolli qarshilik harakatini tuza boshlagani xabar berilgan edi.
Izoh (0)