Ko‘rish qobiliyatining yomonlashishi — insonlar aziyat chekadigan eng keng tarqalgan fobiyalardan biri. Afsuski, yoshga bog‘liq uzoqni ko‘rish qobiliyatining yomonlashishini oldini olishning deyarli imkoni yo‘q, biroq boshqa ko‘z kasalliklari xavfini kamaytirish mumkin. “Noviy ochag” nashri katarakt, glaukoma va ko‘zlarning quruqlashish xavfini kamaytirishga yordam beradigan maslahatlarni taqdim etdi. Nafaqat sabzi va ko‘z mashqlari: bu oddiy maslahatlar ko‘zingizni kasalliklardan himoya qilishga va qarilikgacha yaxshi ko‘rishga yordam beradi.
Haftada kamida ikki marta ismaloq iste’mol qiling
Ismaloq tarkibida yoshga bog‘liq sariq nuqta degeneratsiyasini oldini oladigan, foydali modda bo‘lgan lyutein miqdori ko‘p. Amerika degeneratsiyasi jamg‘armasi tomonidan o‘tkazilgan tadqiqot shuni ko‘rsatdiki, haftasiga ikki marta yarim porsiya ismaloq iste’mol qilish ko‘z kasalligi xavfini sezilarli darajada kamaytiradi va keksalikda ham ko‘rish qobiliyatini saqlab qolishga yordam beradi.
Monitorni ko‘rish masofasidan uzoqroqqa o‘rnating
Kompyuterda ishlayotganda monitor ko‘rish masofasidan pastda joylashganligiga e’tibor bering. Ishlayotganingizda ko‘zlaringiz qisman ko‘z qovoqlari bilan qoplanadi, bu esa o‘z navbatida suyuqlikning bug‘lanishini kamaytiradi va quruq ko‘z sindromi rivojlanishining oldini olishga yordam beradi.
Jismoniy tarbiya bilan shug‘ullanish
Sport haqiqatan ham sog‘liqni, shu jumladan ko‘z salomatligini yaxshilaydi. Muntazam jismoniy mashqlar bilan shug‘ullanish qon aylanishini yaxshilaydi va buning natijasida tananing barcha a’zolari kislorod bilan yaxshi ta’minlanadi. Haftada kamida 150 daqiqa mashq qilishga harakat qiling — bu glaukoma rivojlanish xavfini 40 foizga kamaytiradi.
Yog‘li baliq iste’mol qiling
Omega-3 yog‘ kislotalariga boy losos, sardina, tunets, paltus va boshqa yog‘li baliqlar nafaqat qon tomirlari va yurak uchun foydali, ko‘rish qobiliyatini ham yaxshilaydi. Uzoq vaqt davomida ko‘rish qobiliyatining yaxshi saqlanishi uchun haftada kamida ikki marta baliq iste’mol qiling.
Trans yog‘laridan saqlaning
Tayyor shirinliklar, chipslar, ayniqsa, ko‘p qovurilgan ovqatlar sog‘ligimiz va ko‘rish qobiliyati uchun xavfli hisoblanadi. Ularni tez-tez iste’mol qilish yashirin yallig‘lanish jarayonini kuchaytiradi va yoshga bog‘liq makula degeneratsiyasi tez paydo bo‘ladi, keyin esa ko‘rish qobiliyatini yomonlashadi.
Quyoshdan himoya qiluvchi ko‘zoynaklarini taqing
Iloji boricha UVA va UVB nurlarini to‘sadigan quyoshdan saqlaydigan ko‘zoynaklarni tanlang. Ultrabinafsha nurlanish linzalarning oqsillariga zarar yetkazadi, bu esa yoshga bog‘liq katarakt xavfini oshiradi. Ko‘zoynak taqish nafaqat yoz va bahorda, balki qishda ham muhim: qorda aks etadigan quyosh nurlari ko‘zlaringizga jiddiy zarar yetkazishi mumkin.
Allergiyangiz bor yoki yo‘qligini aniqlash uchun testdan o‘ting
Agar ko‘zlaringiz tez-tez qichiydigan bo‘lsa, bu infeksiyaning belgisi bo‘lishi mumkin yoki rivojlanayotgan allergiyani ko‘rsatishi mumkin. Bundan tashqari, og‘riyotgan ko‘zlaringizni doimiy ravishda ishqalash konyunktivit va boshqa ko‘z infeksiyalarining rivojlanish xavfini oshirishi mumkin. Shuning uchun, agar allergiyangiz borligiga shubha qilsangiz, shifokor bilan maslahatlashing va uning barcha tavsiyalariga rioya qiling.
Chekmang
Muntazam chekish nafaqat ko‘rish qobiliyatiga, balki ranglarni ajratish qobiliyatiga ham ta’sir qilishi mumkin. Psychiatry Research’da chop etilgan tadqiqot shuni ko‘rsatdiki, vaqt o‘tishi bilan chekuvchilarning qizil-yashil va ko‘k-sariq ranglarni ajratish qobiliyati pasayadi. Bundan tashqari, kuniga bir quti yoki undan ko‘p sigaret chekish, oxir-oqibat, kontrastni farqlash qobiliyatini ham pasaytiradi.
Mavzuga doir:
Izoh (0)