Namangan shahridagi “Afsonalar vodiysi” bog‘ida xalqaro asal festivali boshlandi. Bu haqda “Daryo” muxbiri Azizbek Abduvaliyev xabar bermoqda.
Viloyatda ilk bor o‘tkazilayotgan ushbu tadbir Turizm va madaniy meros vazirligining hududiy boshqarmasi tomonidan tashkil etildi.
Festivalda O‘zbekiston, Qozog‘iston, Qirg‘iziston va Tojikistonning asalarichilik uyushmalari va kompaniyalari vakillari, tadbirkorlar ishtirok etmoqda.
“Xalqaro asal festivali biz uchun yangilik, lekin qiziqish juda katta ekanligini ko‘rib turibmiz. Kelgusida gullar festivali kabi bu tadbirni ham keng yo‘lga qo‘yib, an’anaviy tarzda, muntazam tarzda o‘tkazishni rejalashtirib turibmiz. Namanganda buning uchun barcha imkoniyatlar bor”, — dedi festivalning ochilish marosimida ishtirok etgan viloyat hokimi Shavkat Abdurazzoqov.
Viloyat hokimining ta’kidlashicha, Namanganda asal yetishtirish ko‘rsatkichi yildan-yilga oshib bormoqda. Jumladan, viloyatda 2018-yili 1728 tonna, 2019-yilda 1937 tonna, 2020-yilda 2473 tonna asal yetishtirilgan bo‘lsa, 2022-yil yakuniga qadar bu ko‘rsatkich 4500 tonnani tashkil etishi kutilmoqda.
Joriy yilda O‘zbekistondan 311 000 dona asalari paketi eksport qilingan bo‘lsa, shundan 190 000 donasi viloyat ulushiga to‘g‘ri keladi. Namanganda hozirgi kunda 250 000 ta asalari oilasi parvarish qilib kelinmoqda.
Festivalda turli-tuman asal mahsulotlari va asalarichilikda asqatadigan maxsus kiyim va asbob-anjomlar sotuvi, mavzuga oid rasmlar tanlovi, mahorat saboqlari, tadbirkorlarning o‘zaro hamkorlik va eksportni yo‘lga qo‘yish bo‘yicha muzokaralari bo‘lib o‘tmoqda.
Tadbir doirasida tashkilotchilar tomonidan ehtiyojmand oilalarga 1 tonna asal bepul tarqatilishi ko‘zda tutilgan.
Mavzuga doir: Namanganda ilk bor xalqaro asal festivali o‘tkaziladi
Izoh (0)