Islandiyada shaxmat bo‘yicha World Fischer Random Chess Championship musobaqasi bo‘lib o‘tmoqda.
Ushbu musobaqada o‘zbekistonlik Nodirbek Abdusattorov ham ishtirok etmoqda. Abdusattorov 1-turda Yan Nepomnyashiyga qarshi dona surdi. Nodirbek ikkita o‘yinda ham rossiyalik tajribali grossmeysterni mag‘lub etdi. 2-turda esa amerikalik Uesli So taslim etildi — bitta g‘alaba va durang.
Nodirbek 3 va 4-turda mezbonlar vakili, islandiyalik Hyyorvar Steyn Gretarssonga qarshi o‘ynadi va har ikkala partiyada ham g‘alaba qozondi.
Shu tariqa, Nodirbek o‘z hisobidagi ochkolar sonini 8 taga yetkazib oldi va guruh bosqichi yakunlanishiga 2 tur qolganda yarim final masalasini hal qildi. 27-oktabr kuni o‘zbekistonlik shaxmatchi 5-turda Yan Nepomnyashiyga qarshi ikkita o‘yin o‘tkazsa, 6-turda amerikalik Uesli So bilan o‘yin kutmoqda.
Eslatib o‘tamiz, shaxmatchilar tur doirasida 2 ta partiya o‘tkazadi. G‘alaba qozongan shaxmatchi 2 ochkoga ega bo‘ladi.
A guruhi
1. Abdusattorov — 8 (7,5)
2. Nepomnyashiy — 5 (5)
3. So — 3 (3)
4. Gretarsson — 0 (0,5)
B guruhi
1. Karlsen — 6 (5,5)
2. Nakamura — 6 (5)
3. Fedoseyev — 4 (4)
4. Blubaum — 0 (1,5)
Ma’lumot uchun, musobaqaning mukofot jamg‘armasi 400 ming AQSH dollarini tashkil etadi. G‘olib 150 ming dollarga ega chiqadi.
Ushbu musobaqa o‘ziga xos reglamenti bilan ajralib turadi. Unda odatiy shaxmatdan farqli o‘laroq dastlabki qatordagi donalar tasodifiy tarzda joylashtiriladi.
Izoh (0)