Fransiyalik abstrakt-rassom, asarlarining aksariyatini qora rangda chizgani bilan tanilgan Pyer Sulaj 102 yoshida vafot etdi, deb yozmoqda Deutsche Welle.
Rassomning vafoti haqida Sulajning hayoti va ijodiga bag‘ishlangan muzey ma’muriyati ma’lum qilgan. Muzey uning Fransiya janubi-g‘arbidagi ona shahri Rodezda joylashgan.
“Pyer Sulaj 26-oktabr, chorshanba kuni 102 yoshida vafot etdi”, — deyiladi ijodkorning rasmiy saytida.
Fransiya prezidenti Emmanuel Makron rassom xotirasiga Twitter’da post qoldirdi.
“Pyer Sulaj qora rangni yorug‘likka ochib, uni qaytadan ixtiro qila oldi. Uning ishlari zulmat ortidan metafora bo‘lib, ular har birimizga umid baxsh etadi”, — deb yozgan Makron.
Sulaj chizgan suratlar dunyoning 110 dan ortiq muzeylarida osilgan va ular uchun rassom yetti xonali raqamlarda haq olgan. Jumladan, uning 1960-yilda chizgan qalin qora chiziqlardan iborat asari 2019-yilda Luvrdagi kim oshdi savdosida 10,5 million dollarga sotildi. Uning ko‘pgina asarlariga nom berilmagan, ular surat uchun ishlatilgan texnika, o‘lcham va chizilgan sana bilan nomlanadi. Uning asarlari minimalizm uslubida chizilgan, ularda qora rang ustunlik qiladi.
2019-yil dekabr oyida 100 yoshga kirgani munosabati bilan rassom Parijdagi Luvrda shaxsiy ko‘rgazmasi bilan taqdirlandi. U Mark Shagal va Pablo Pikasso singari hali hayotlik paytida muzeyda shaxsiy ko‘rgazma o‘tkazishga muvaffaq bo‘lgan uchinchi rassom bo‘ldi.
Izoh (0)