Andijon shahridagi kafelarning birida xonandalar — Jaloliddin Ahmadaliyev va Hamdam Sobirovlarning qo‘shiqlaridan ruxsatsiz foydalangani uchun kafe egasi 60 million so‘m jarimaga tortildi. Bu haqda “Daryo” muxbiri xabar bermoqda.
Aniqlanishicha, O‘zbekiston Respublikasi mualliflik va turdosh huquqlarni himoya qilish jamiyati Andijon shahridagi umumiy ovqatlanish joyida jamiyat a’zolari hisoblangan Hamdam Sobirov va Jaloliddin Ahmadaliyev ijrosidagi qo‘shiqlardan hech qanday ruxsatsiz hamda tegishli litsenziya shartnomasi tuzmagan holda foydalanayotgani yuzasidan viloyat adliya boshqarmasiga murojaat qilgan. Murojaatda jamiyat xonandalar bilan tuzilgan shartnomalarga asosan ijrochilarning mualliflik huquqi obyektlariga bo‘lgan mutlaq huquqini respublika hududida himoya qilishi qayd qilingan.
Murojaatni ko‘rib chiqish davomida haqiqatan ham Andijon shahrida faoliyat yurituvchi “M.S.P” MCHJ tomonidan Hamdam Sobirov ijrosidagi “Yigirmanchi mart”, “Tentakcham” hamda Jaloliddin Ahmadaliyev ijrosidagi “Janonim”, “Yor bizdan ketdi” nomli qo‘shiqlari hech qanday ruxsatsiz va tegishli shartnoma tuzmagan holda omma e’tiboriga yetkazib kelingan.
O‘rganish yuzasidan tadbirkorga yuqorida qayd etilgan qo‘shiqlarni foydalanadigan ijrolar ro‘yxatidan (pleylist) o‘chirishni so‘rab, taqdimnoma kiritilgan. Shuningdek, jamiyat rahbariga mualliflik va turdosh huquq obyektlaridan faqat huquq egasi yoki boshqa vakolatli shaxs bilan tuzilgan shartnomaga binoan foydalanish lozimligi tushuntirilgan.
Shundan so‘ng, Mualliflik va turdosh huquqlarni himoya qilish jamiyati Fuqarolik ishlari bo‘yicha Andijon tumanlararo sudiga tadbirkordan xonandalar foydasiga tovon puli undirish hamda mualliflik huquqini tiklash haqida da’vo arizasi kiritgan. Sud da’vo arizani qanoatlantirib, javobgardan da’vogarlar Jaloliddin Ahmadaliyev hamda Hamdam Sobirovlarga mualliflik huquqini buzilishi natijasida kelib chiqqan har biriga 30 million so‘mdan, jami 60 million so‘m tovon puli to‘lab berish belgilangan.
Izoh (0)