Toshkent viloyatida tashlab ketilgan o‘lik tovuqlar chiqindilarni qayta ishlovchi korxonalarga yuborildi

Toshkent viloyatining Yuqori Chirchiq tumanida noma’lum shaxslar ikki tonnaga yaqin o‘lgan tovuqlar tashlab ketgani aniqlangandi. Viloyat Ekologiya va atrof-muhitni muhofaza qilish boshqarmasi matbuot xizmati bunga munosabat bildirdi.

Qayd etilishicha, holat Toshkent viloyati Ekologiya va atrof-muhitni muhofaza qilish boshqarmasi xodimlari tomonidan joyiga chiqib o‘rganildi. O‘rganishlar davomida Yuqori Chirchiq tumanining “Miyam kangli” mahalla fuqarolar yig‘ini hududida joylashgan yer maydoniga noma’lum shaxslar tomonidan parranda qoldiqlari tashlab ketilgani aniqlandi.

Parranda qoldiqlarini belgilangan tartibda yo‘q qilish maqsadida maxsus texnikalar yordamida chiqindilarni qayta ishlovchi korxonalarga utilizatsiya qilish uchun yuborildi.

Hozirda chiqindilarni tashlab ketgan shaxslarni aniqlash yuzasidan o‘rganish ishlari olib borilmoqda.