Xalq deputatlari Andijon tuman kengashining navbatdan tashqari sessiyasida “O‘ztransgaz” aksiyadorlik jamiyati boshqaruvi raisining moliya va marketing bo‘yicha o‘rinbosari Baxtiyor Mamatkarimov Andijon tumani hokimi lavozimiga tayinlandi. Bu haqda “Daryo” muxbiri xabar bermoqda.
Baxtiyor Mamatkarimov 1980-yil Qo‘rg‘ontepa tumanida tug‘ilgan bo‘lib, 2000-yilda Toshkent moliya institutining moliya va kredit, 2013-yilda Bank-moliya akademiyasining bank ishi yo‘nalishini, 2021-yilda Davlat boshqaruvi akademiyasini tugatgan.
Mehnat faoliyatini 2001-yilda “Asakabank” davlat aksiyadorlik tijorat banki Andijon viloyati filiali valyuta sho‘basi pul almashtirish shoxobchasi kassiri vazifasidan boshlagan. 2003—2020-yillarda “Asakabank” davlat aksiyadorlik tijorat banki Andijon viloyati filiali kredit bo‘limi mutaxassisi, valyuta va savdo amaliyotlar bo‘limi boshlig‘i, kredit bo‘limi bosh mutaxassisi, “Asakabank” davlat aksiyadorlik tijorat banki Andijon viloyati filiali ichki nazorat sektori mutaxassisi, jamg‘arma amaliyotlar sho‘basi mudiri, Markaziy bank Andijon viloyati bosh boshqarmasi Tijorat banklarini nazorat qilish bo‘limi iqtisodchisi, Banklar va nobank kredit tashkilotlarini nazorat qilish bo‘limi iqtisodchisi, “Trastbank” xususiy ochiq aksiyadorlik birja banki Ichki audit boshqarmasi bosh mutaxassisi, boshqarma boshlig‘i o‘rinbosari, boshlig‘i, Ichki audit departamenti direktori, “Neftgazinvest” mas’uliyati cheklangan jamiyati tuzilgan shartnomalarning ijrosini monitoring qilish bo‘yicha guruhi rahbari, “O‘zLITIneftgaz” AJ boshqaruvi raisining iqtisod va moliya bo‘yicha o‘rinbosari vazifalarida faoliyat yuritgan.
U 2020-yil oktabrdan buyon “O‘ztransgaz” aksiyadorlik jamiyati boshqaruvi raisining moliya va marketing bo‘yicha o‘rinbosari lavozimida faoliyat yuritib kelgan.
Avvalroq 27-sentabr kuni Prezident administratsiyasi rahbari Sardor Umurzoqov videoselektor yig‘ilishida, lavozimiga noloyiq deb topilgan Andijon tumani hokimi Abdujabbor Egamberdiyev ishdan bo‘shatilgani xabar berilgandi.
Eslatib o‘tamiz, avgust oyida Andijon tumani hokimi Abdujabbor Egamberdiyevning hokimlik binosi hovlisida fuqarolar uchun bo‘lib o‘tgan sayyor qabuli keng muhokamalarga sabab bo‘lgandi. Unda hokim ayvon ichida o‘tirib, fuqarolarni esa ayvonda tashqariga o‘tqazib muloqot qilgan. Buni hokimlik ijtimoiy masofa saqlash uchun qilingan, deb izohlagandi.
Izoh (0)