Surxondaryo viloyati Denov tumanida 4 nafar fuqaro foydasiga 1 milliard 424 million so‘mdan ortiq kompensatsiya undirildi. Bu haqda Majburiy ijro byurosi “Daryo”ga xabar berdi.
Qayd etilishicha, Denov tumani markazida qurilish ishlari olib borilib, 4 nafar fuqaroning uy-joylari, ishlab chiqarish imoratlari va boshqa inshootlar tuman hokimiyatining kelishuv bitimiga asosan davlat va jamoat ehtiyojlari uchun buzilib, ushbu uy-joylar uchun kompensatsiya to‘lab berilishi va’da qilingan.
Kelishuv bitimiga asosan fuqarolar foydasiga tuman hokimligi tomonidan kompensatsiya puli o‘z vaqtida to‘lab berilmagani sababli ushbu masala fuqarolik ishlari bo‘yicha Denov tumanlararo sudida ko‘rib chiqilib, tuman hokimligi hisobidan 4 nafar fuqaroga jami 1 milliard 424 million 867 ming so‘m kompensatsiya undirilishi beliglangan edi.
Mazkur sudning ijro hujjatlari Majburiy ijro byurosi Denov tuman bo‘limi ish yurituviga qabul qilinib, majburiy ijro harakatlariga kirishildi. Majburiy ijro harakatlari davomida “Sud hujjatlari va boshqa organlar hujjatlarini ijro etish to‘g‘risida”gi qonunning tegishli moddalariga asosan tuman xokimligiga talabnoma yuborilib, hisob raqamlariga inkasso topshiriqnomalari qo‘yildi.
Shundan so‘ng tuman hokimligi hisobidan mazkur ijro hujjatlari bo‘yicha fuqarolar foydasiga kompensatsiya pullari to‘liq undirilib, undiruvchilarning nomida ochilgan plastik kartalariga o‘tkazib berilishi ta’minlandi hamda ijro hujjatlari belgilangan tartibda ish yurituvdan tugatildi.
Izoh (0)