“Boka Xuniors” Argentina chempionatining 27-turida “Independyente” bilan 2:2 hisobida durang o‘ynadi va mamlakat chempionligini qo‘lga kiritdi.
Buenos-Ayres klubi 27 turdan so‘ng 52 ochko jamg‘arishga muvaffaq bo‘ldi. Ikkinchi o‘rinni 50 ochko bilan “Rasing”, uchinchi o‘rinni esa 47 ochko bilan “River Pleyt” jamoalari egalladi. Ikkala jamoa so‘nggi turda o‘zaro bahs olib bordi va “River Pleyt” 2:1 hisobida g‘alaba qozondi.
Uchrashuvning 90-daqiqasida hisob 1:1 bo‘lib turgan vaqtda “Rasing” yarim himoyachisi Xonatan Galvan penaltini aniq amalga oshira olmadi. 95-daqiqada esa “River Pleyt” hujumchisi Migel Borxa g‘alaba golini urdi. Agarda “Rasing” zafar quchganda “Boka Xuniors”dan o‘tib ketardi va chempionga aylanar edi.
“Boka” o‘z tarixida 29-marta Argentina chempionligini qo‘lga kiritdi. Chempionlik bo‘yicha rekord “River Pleyt”ga tegishli. Jamoa 36 marta Argentina Superligasida zafar quchgan.
Izoh (0)