Toshkent shahri Mirzo Ulug‘bek tumanida joylashgan sexlarning birida gaz chaqnashi oqibatida portlash yuz bergan. Bu haqda Toshkent shahar favqulodda vaziyatlar boshqarmasi matbuot xizmati rahbari Anvar Rustamov “Daryo”ga ma’lum qildi.
Anvar Rustamovning aytishicha, 21-oktabr kuni kechki soat 01:40 lar atrofida Toshkent shahar favqulodda vaziyatlar boshqarmasining tezkor boshqaruv markaziga Mirzo Ulug‘bek tumanidagi “Alisherobod” mahallasida joylashgan metallarni bo‘yash sexida yong‘in bo‘layotgani haqida xabar kelib tushgan.
“Xabarga ko‘ra maxsus qutqaruv kuchlari voqea joyiga jalb qilingan. Voqea joyiga yetib kelingan vaqtda 20 metr kvadrat maydonda yong‘in ro‘y bergani hamda havo va gaz chaqnashiga o‘xshash portlash yuz bergani ko‘ringan. O‘rganishlar natijasida propan gaz ballonining chaqnaganligi shu bilan birga, yong‘in kelib chiqqani ma’lum bo‘lgan. Yuzaga kelgan vaziyat natijasida ikkita fuqaro kuyish tan jarohati natijasida shifoxonaga olib borilgan”, — dedi Anvar Rustamov.
Uning qo‘shimcha qilishicha, ayni vaqtda ushbu holatning kelib chiqish sabablari o‘rganilmoqda va tuman prokuraturasi tergovga qadar tekshiruv ishlarini olib bormoqda.
Avval ham shu joyda yong‘in yuz bergan
Portlash yuz bergan hududda 2021-yilning mart oyida kechasi yong‘in yuz bergan edi. Olovni o‘chirish vaqtida ushbu ishlab chiqarish hududida ishlagan 42 yoshli erkak murdasi topilgan. Sud-tibbiy ekspertiza xulosasiga ko‘ra, u suvga cho‘kib, nafas yo‘llarining suyuqlik bilan berkilishidan kelib chiqqan mexanik asfiksiya oqibatida vafot etgan. Murdaning peshona, burun, yelka va panjalarida kuyish jarohatlari ham aniqlangan.
Holat bo‘yicha Qibray tuman prokuraturasi tomonidan Jinoyat-protsessual kodeksining 83-moddasi 2-bandiga (gumon qilinuvchining qilmishida jinoyat tarkibi bo‘lmagani uchun aybsiz deb topish va reabilitatsiya etish) asosan jinoyat ishi qo‘zg‘atishni rad etish haqida qaror qabul qilgan.
Izoh (0)