“Toshkent shahridagi ijtimoiy obyektlar va binolarning 85 foizida nogironligi bo‘lgan shaxslar harakatlanishi uchun sharoit yo‘q” – senator

Toshkent shahridagi ijtimoiy obyektlar va binolarning 85 foizida nogironligi bo‘lgan shaxslar harakatlanishi uchun sharoit mavjud emas. Bu haqda Senat kengashining navbatdagi yig‘ilishida senator Odiljon Iminov aytib o‘tdi, deya “Daryo”ga ma’lum qilmoqda parlament yuqori palatasi axborot xizmati.

Majlisda Odiljon Iminov shaharsozlikda nogironligi bo‘lgan shaxslarning ehtiyojlarini ham hisobga olish zarurligi, ularning barcha ijtimoiy infratuzilma obyektlaridan moneliksiz foydalanishiga sharoit yaratish muhimligi to‘g‘risida gapirgan.

Toshkent shahri ijtimoiy infratuzilmasi obyektlari va binolarining 85 foizi hanuzgacha nogironligi bo‘lgan shaxslar tomonidan to‘siqsiz foydalanish uchun moslashtirilmagan.

Birinchidan, yer osti transportidan qulay foydalanish uchun to‘liq sharoitlar yaratilmagan. Metro stansiyalarining ko‘plari panduslar bilan jihozlanmagan, bu esa shaharsozlik me’yorlari talablariga javob bermaydi.

Ikkinchidan, nogironligi bo‘lgan shaxslar tomonidan shahar yer usti transportidan mustaqil foydalanish imkoniyati to‘liq yaratilmagan. Ayniqsa, aravachalar yordamida harakatlanadigan nogironligi bo‘lgan shaxslar, ko‘zi ojizlar va qulog‘i og‘irlarning erkin harakatlanishi uchun jamoat transportining moslashmaganligi, xususan avtobus salonlarida elektron axborot tablolarining, eshitish moslamalari va boshqa yordamchi vositalarning mavjud emasligi murakkabliklar keltirib chiqarmoqda.

Uchinchidan, yo‘l bo‘yi infratuzilma obyektlari (yer osti va yer usti o‘tish yo‘llari) bir qator sezilarli kamchiliklarga ega. Xususan, ayrim yer usti o‘tish yo‘llarida (Sebzor va A.Qodiriy ko‘chalarining kesishmasida) loyihalashtirish jarayonida liftlar ko‘zda tutilgan bo‘lsa-da, amalda mavjud emas. Shuningdek, mazkur joyda eskalatorlar ham ishlamaydi.

To‘rtinchidan, jamoat joylarida nogironligi bo‘lgan shaxslar uchun zarur eshitish va ko‘rish ma’lumotlari, shu jumladan relyef nuqtali Brayl shriftida tayyorlangan ko‘rsatkich va belgilar mavjud emas.

Odiljon Iminov, senator. 

Majlisda O‘zbekiston nogironlar uyushmasi tomonidan o‘tkazilgan so‘rovnomada nogironligi bo‘lgan shaxslarning 93 foizi yer usti jamoat transportini to‘siqsizlik nuqtayi nazaridan qoniqarsiz deb baholashgani aytilgan. Shu bilan birga, piyodalar yo‘lakchalarida texnik moslamalar, ya’ni ko‘zi ojiz shaxslar uchun ovozli ishora bilan jihozlangan svetofor mavjud emasligi sezilarli to‘siqlardan biridir. “Bu nogironligi bo‘lgan shaxslarning nafaqat faol va mustaqil harakatlanish imkoniyatini to‘smoqda, balki yo‘l harakati vaqtida ularning hayotini xavf ostiga qo‘ymoqda. Bunday holatlar nogironligi bo‘lgan shaxslarning yordamga muhtoj tarzda harakatlanish uchun yaqinlariga qaram bo‘lib qolishini taqazo etmoqda”, – deya ta’kidlagan senator.