Rossiyada baxtsiz hodisaga uchrab, mehnatga layoqatsiz bo‘lib qolgan fuqaro O‘zbekistonga qaytarildi

Rossiyaning Xakasiya Respublikasi Abakan shahriga ishlash maqsadida borib, mehnatga layoqatsiz bo‘lib qolgan fuqaro O‘zbekistonga qaytarildi.

Tashqi mehnat migratsiyasi agentligining ma’lum qilishicha, fuqaro Q.R. u yerga 2022-yilning yanvar oyida ishlash maqsadida borgan. Qurilish obyektida ishlayotgan vaqtida baxtsiz hodisaga uchragan va bir necha kundan keyin qoqshol tashxisi bilan Abakan shahrining tez tibbiy yordam shifoxonasiga yotqizilgan.

Fuqaro mehnatga layoqatsiz bo‘lib, murakkab moliyaviy ahvolda qoladi va Tashqi mehnat migratsiyasi agentligidan O‘zbekistonga qaytarishda moddiy va amaliy yordam berishni so‘raydi.

Shundan so‘ng u xorijda mehnat faoliyatini amalga oshiruvchi fuqarolarni qo‘llab-quvvatlash hamda ularning huquq va manfaatlarini himoya qilish jamg‘armasi mablag‘lari hisobidan Krasnoyarsk—Toshkent yo‘nalishi bo‘yicha aviachipta bilan ta’minlandi va O‘zbekistonga qaytarildi.

Mavzuga doir:

• Rossiyada ish vaqtida ehtiyotsizligi sababli umurtqa suyagi singan fuqaro O‘zbekistonga qaytarildi
• Rossiyada qiyin ahvolda qolgan o‘zbekistonlik ayol vatanga qaytarildi
• Rossiyada tanasining yarmi kuygan O‘zbekiston fuqarosi vatanga qaytarildi