AQSHning Boston Consulting Group (BCG) konsalting kompaniyasi bugun, 17-oktabr kuni Toshkentda yangi ofis ochilishi haqida ma’lum qildi. Bu haqda “Kommersant” xabar bermoqda.
Kompaniya O‘zbekistonda 2017-yildan buyon faoliyat yuritib kelmoqda. BCG Markaziy Osiyo va Kaspiy mintaqalarida o‘z ishtirokini rivojlantirish niyatida ekanini ta’kidlagan.
Biz O‘zbekistonda besh yildan ortiq vaqtdan beri ishlaymiz. Mamlakat murakkab o‘zgarishlarni boshidan kechirmoqda, jadal sur’atlar bilan rivojlanmoqda va ko‘z o‘ngimizda o‘zgarib bormoqda. Biz bu o‘zgarishlarning bir qismi bo‘lganimizdan mamnunmiz, — dedi BCG Tashkent rahbari Rizo Nuriyev.
Uning ta’kidlashicha, Toshkentda ofis ochish, BCG uchun global tajriba va mahalliy vakolatlarga ega to‘liq huquqli markaz mavjudligini anglatadi.
Mart oyining boshida BCG, boshqa ko‘plab xalqaro konsalting kompaniyalari singari, Rossiyadagi faoliyatini to‘xtatgandi. Iyun oyida kompaniya Bokuda yangi ofisini ochdi.
Boston Consulting Group — 1963 yilda tashkil etilgan va shtab-kvartirasi Massachusets shtatining Boston shahrida joylashgan Amerika global boshqaruv konsalting kompaniyasi.
Kompaniya daromadlari bo‘yicha dunyodagi uchta eng yirik boshqaruv konsalting firmalari qatoriga kiradi.
Izoh (0)