Armaniston Qrim ko‘prigidagi portlash tufayli jinoyat ishi qo‘zg‘atdi

Armaniston Milliy xavfsizlik xizmati Qrim ko‘prigidagi portlashga Armaniston fuqarosi aloqadorligi ehtimoli haqida ma’lumotlar paydo bo‘lganidan keyin, xalqaro terrorizmga hamkorlik qilish haqida jinoiy ish qo‘zg‘atdi, deb yozadi “Kommersant”. Bundan tashqari, tergovchilar qalbaki hujjatlardan foydalanib, Yevrosiyo iqtisodiy ittifoqi (YOII) chegarasidan portlovchi moddalar kontrabanda qilingani haqidagi axborotni ham tekshiradi.

Milliy xavfsizlik xizmati qayd etishicha, ish Qrim ko‘prigidagi portlash yuz bergan “vaziyatni aniqlashtirish va olingan ma’lumotlarning ishonchliligini tekshirish” uchun ochilgan.

Rossiya maxsus xizmatlarining ko‘prikni portlatishda Armaniston fuqarosi qatnashgani ehtimoli haqidagi ma’lumotini Armaniston Bosh prokuraturasi 12-oktabr kuni mamlakat Xavfsizlik xizmatiga taqdim etgandi.

Qrim ko‘prigida 8-oktabr kuni yuk mashinasi portlab ketdi, oqibatda avtomobil yo‘lining bir qismi qulab tushdi. Rossiya Tergov qo‘mitasi hodisani Ukraina maxsus xizmatlari tomonidan amalga oshirilgan terakt deb baholamoqda. Tergov versiyasiga ko‘ra, jinoyatni uyushtirishda 12 kishi — besh nafar rossiyalik hamda Ukraina, Gruziya va Armaniston fuqarolari qatnashgan. Da’vo qilinishicha, portlovchi qurilma Odessa portidan Bolgariyaning Ruse shahriga yuborilgan, yuk Yerevanda YOII qoidalari bo‘yicha bojxona rasmiylashtiruvidan o‘tgan. Shundan keyin u Armaniston kompaniyalaridan biri tomonidan yuborilgan.

Avvalroq Rossiya Federal xavfsizlik xizmati Qrim ko‘prigidagi portlash yuzasidan qo‘zg‘atilgan jinoiy ish doirasida besh nafar rossiyalik, uch nafar ukrainalik va armanistonlik fuqarolar qo‘lga olinganini ma’lum qilgandi. Ular jinoyatni tayyorlashda ishtirok etganlikda gumonlanmoqda.