Farg‘ona va Qashqadaryo viloyatlarida o‘qishga kiritish hamda o‘qishni ko‘chirib berish bilan bog‘liq firibgarlik holatlari fosh etildi, deb xabar bermoqda Iqtisodiy jinoyatlarga qarshi kurashish departamenti.
Ma’lum qilinishicha, Bosh prokuratura huzuridagi departament va DXXning Farg‘ona tumani bo‘limlari tomonidan IIB xodimlari bilan hamkorlikda tezkor tadbir o‘tkazilgan. Unda fuqaro B.M. boshqa bir fuqaro M.ning ishonchiga kirib, 3500 dollar evaziga uni qo‘shni Qirg‘izistonda joylashgan universitetidagi o‘qishini tanishlari yordamida Farg‘ona davlat universitetiga ko‘chirib berishini aytib, oldindan 2000 dollar olgan vaqtida ashyoviy dalillar bilan ushlangan.
Shu kabi, departamentning G‘uzor tumani bo‘limi tomonidan o‘tkazilgan tezkor tadbirda fuqaro M.Sh. boshqa bir fuqaro E.ni go‘yoki yuqori lavozimda ishlovchi tanishlari yordamida Shahrisabz Abu Ali Ibn Sino nomidagi jamoat salomatligi texnikumiga o‘qishga kiritib qo‘yishi evaziga ming dollarni firibgarlik yo‘li bilan olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)