Bosh prokuratura departamenti Toshkent va Samarqanddagi banklarda pul mablag‘larining talon-toroj qilinishi bo‘yicha aniqlangan qonunbuzilish holatlari haqida ma’lumot berdi.
Departamentning Toshkent shahri Sergeli tuman bo‘limi tomonidan ATB InfinBank Sergeli filialining murojaatiga asosan o‘tkazilgan tergovga qadar tekshiruvda, fuqaro X.P. va boshqalar, o‘zaro til biriktirib, ushbu bank filialidan ajratilgan 408,8 million so‘m kredit hisobidan xarid qilingan 5 dona Nexia-3 ni soxta hujjatlar orqali garovga qo‘yilishini ta’minlamasdan boshqa shaxslarga sotib yuborib, ushbu mablag‘larni o‘zlashtirish yo‘li bilan talon-toroj qilgani aniqlangan.
Departamentning Samarqand shahar bo‘limi tomonidan AT “Xalq banki” Samarqand viloyat amaliyot bo‘limining murojaatiga asosan o‘tkazilgan tergovga qadar tekshiruvda aniqlanishicha, ushbu amaliyot bo‘limi mas’ul shaxslari kredit va unga tenglashtirilgan operatsiyalar bo‘yicha ta’minotni tanlash va qabul qilish to‘g‘risidagi talablarga amal qilmaganliklari oqibatida “J.CH.” MCHJga savdo va aylanma mablag‘larini to‘ldirish uchun ajratilgan 1,8 milliard so‘m kredit mablag‘lari maqsadsiz sarflanib, o‘zlashtirish yo‘li bilan talon-toroj qilingan.
Shu kabi, departamentning Samarqand viloyati Payariq tuman bo‘limi tomonidan o‘tkazilgan tergovga qadar tekshiruvda, “P.I.” MCHJ ish boshqaruvchisi M.E. hududiy tijorat banki filialidan imtiyozli shartlar asosida 6 nafar fuqaroga ajratilgan 166,7 million so‘m kredit mablag‘i evaziga naslli chorva molini yetkazib bermasdan, kredit mablag‘larini o‘zlashtirgani aniqlangan.
Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 228-moddasi (hujjatlar, shtamplar, muhrlar, blanklar tayyorlash, ularni qalbakilashtirish, sotish yoki ulardan foydalanish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)