6-oktabr kuni Toshkent shahrida avvaldan kuzatuvga olingan yuk mashinasidan pirotexnika vositalari topildi. Bu haqda Davlat bojxona qo‘mitasi “Daryo”ga ma’lum qildi.
Qayd etilishicha, “Toshkent-Aero” ixtisoslashtirilgan bojxona kompleksining Kontrabandaga qarshi kurash bo‘limi xodimlari tomonidan Davlat xavfsizlik xizmati bilan hamkorlikda o‘tkazilgan navbatdagi tezkor tadbirda oldindan kuzatuvga olingan shaxs boshqaruvidagi Isuzu yuk avtotransport vositasi to‘xtatilib, ko‘zdan kechirilgan. Yukxonadagi ketmon dastalari ortiga yashirilgan qog‘oz qutilar tezkor xodimlarning e’tiborini tortgan.
Qog‘oz qutilar ochib ko‘rilganida esa ularning ichida 5 turdagi 77 272 dona pirotexnika vositalari borligi aniqlangan.
Dastlabki hisob-kitoblarga ko‘ra, xorijda ishlab chiqarilgan, ammo, sifatini va bojxona rasmiylashtiruvini tasdiqlovchi hujjatlari bo‘lmagan mazkur salyut va petardalarning jami qiymati 433 million so‘mni tashkil qilmoqda.
Shuningdek, yukxonada muqaddam noqonuniy ravishda olib kirilgan 28 ming 640 dona lekoplastir va termometrlar ham borligi aniqlangan. Ularning umumiy qiymati 146 million so‘mdan oshmoqda.
Bundan tashqari, tovarlar orasida 41 ming 488 dona shaxsiy gigiyena va parfyumeriya vositalari borligi aniqlangan. 116 million so‘mdan oshiq qiymatdagi mazkur tovarlarning qadog‘ida ham ularning ishlab chiqarilgan joyi, muddati haqida va boshqa zaruriy bironta ham axborotlar mavjud emas.
Mazkur holatda to‘xtatib qolingan tovarlarning umumiy qiymati salkam 696 million so‘mni tashkil qilmoqda.
Holat yuzasidan bojxona organlari tomonidan tergovga qadar tekshiruv harakatlari olib borilmoqda.
Raqamlarga ko‘ra, joriy yilning o‘tgan davri mobaynida respublikamiz bojxonachilari tomonidan huquqni muhofaza qiluvchi turli idoralar bilan hamkorlikda aniqlangan 27 ta qonun buzilish holatlarida qiymati 652 million 80 ming so‘mlik 109 ming 168 dona pirotexnika vositalarining noqonuniy olib o‘tilishining o‘z vaqtida oldi olingan.
Izoh (0)