Ijtimoiy tarmoqlarda Andijon viloyatining Izboskan tumanida yashovchi ayolning farzandi nobud bo‘lgani hamda ayolda bir necha marotaba jarrohlik amaliyoti o‘tkazilgani xabar tarqaldi. Viloyat sog‘liqni saqlash boshqarmasi tomonidan ushbu holat yuzasidan munosabat bildirdi.
Ta’kidlanishicha, 1992-yil tug‘ilgan J.N. 2022-yilning 1-oktabr kuni soat 14:40 da Izboskan tuman tibbiyot birlashmasining tug‘uruq majmuasiga qabul qilingan. 2018-yilda kesar kesish operatsiyasini o‘tkazgan homilador ayolda 3-4 kun davomida ko‘ngil aynishi, tana haroratining 38 gradusgacha ko‘tarilishi kuzatilgan.
2022-yil 4-oktabr kuni soat 17:00 da tug‘uruq majmui mudiri homilador ayolni tibbiy ko‘rikdan o‘tkazgan. Shunga ko‘ra, holatiga qarab, homiladorlikni tabiiy tug‘ruq bilan emas, jarrohlik amaliyoti bilan amalga oshirishni rejalashtirgan. Ayolni amaliyotga tayyorlash uchun intensiv davo muolajalari tavsiya qilingan. Operatsiyaga tayyorlash uchun anesteziolog, terapevt va boshqa mutaxassislar ko‘rigi, organizmni operatsiyaga tayyorlash uchun infuzion-inyeksion dori muolajalari o‘tkazilgan. Shundan so‘ng, 5-oktabr kuni soat 08:45 da kesarcha kesish yo‘li bilan undan o‘g‘il jinsli o‘lik homila (4 kilo 650 gramm vaznda) olingan. Homilani hayotga qaytarish uchun olib borilgan reanimatsion choralar foydasiz bo‘lgan.
“Ayolning salomatligi ham ijobiy bo‘lmagan, teri rangi sarg‘ayish belgilari paydo bo‘lgani sababli tuman bosh infeksionisti tomonidan virusli gepatit B tashxisiga gumon qilinib, qo‘shimcha tekshiruvlar tavsiya qilingan. Bemorning umumiy holati hisobga olinib, sanitar aviatsiya orqali viloyatdan akusher-ginekolog, infeksionist mutaxassislari chaqirilib, maslahatlari olingan. 7-oktabr kuni malakali ixtisoslashgan tibbiy yordam ko‘rsatish maqsadida viloyatdagi bosh mutaxassislar bilan maslahatlashib, Respublika shoshilinch tibbiy yordam ilmiy amaliy markazi Andijon filialiga o‘tkazilgan. 9-oktabr kuni esa bemorning umumiy ahvoli o‘zgarishsiz qolgan, qornida peritoneal belgilar bo‘lgan. Shuningdek, gemotransfuziya, plazmotransfuziya amalga oshirilayotganligi sababli tuman tibbiyot birlashmasi ko‘p tarmoqli markaziy poliklinikasi Lo‘g‘umbek bo‘limining ko‘ngilli tibbiyot xodimlari tomonidan 10-oktabr kuni uch nafar qon donorlari viloyat Qon quyish markaziga jalb etilgan. Yana 10 nafar tibbiyot xodimlari ko‘ngilli ravishda ayol uchun donorlik-qon berish istagini bildirgan”, — deydi mas’ullar.
Qo‘shimcha qilinishicha, ayni paytda bemorning umumiy holati stabil og‘ir. Qon ivish xususiyatining tarqalgan buzilishi asorati kuzatilmoqda. Tibbiyot xodimlari tomonidan hayotini saqlab qolish bo‘yicha barcha tadbirlar o‘tkazilmoqda. Natijada salomatlik holatida ijobiy o‘zgarishlar namoyon bo‘lmoqda. Bemor salomatligi viloyat sog‘liqni saqlash boshqarmasi boshlig‘ining shaxsiy nazoratiga olingan.
Izoh (0)