Zanjabil, asal va sitrus mevalarini pishirmasdan ham immunitet uchun foydali bo‘lgan murabbo tayyorlash mumkin. Atigi bir necha daqiqa ichida shamollashdan qutqaradigan, kayfiyatni ko‘taradigan va kuch-quvvat beruvchi vitaminga boy aralashma hosil bo‘ladi, deb yozadi “Noviy ochag”.
Buning uchun zanjabil ildizi sotib olinadi. Limonning yangisi tanlanadi. Asal esa suv bug‘i yordamida biroz ilitiladi. Keyin zanjabil, limon va asaldan sog‘lom, xushbo‘y, nozik ta’mli murabbo tayyorlanadi, uni qaynatish ham kerak emas. Shamollashning birinchi alomatlaridayoq choyga qo‘shib ichish yoki shunchaki o‘zini iste’mol qilish mumkin.
Ish uchta limon, 6-7 sm uzunlikdagi zanjabil ildizi va 200 gramm asalni tayyorlab olishdan boshlanadi. Limonlar yaxshilab yuviladi, zanjabil ildizi tozalanadi.
Limon qobig‘i bilan katta to‘rtburchak shaklda kesib olinadi. Xuddi shu tarzda zanjabil ham maydalanadi.
Tog‘ralgan limon va zanjabil blenderga solinadi, bir xil massa hosil bo‘lguncha maydalanadi. Immunitetni mustahkamlashda foydali bo‘lgan murabbo deyarli tayyor.
Zanjabil-limon aralashmasi idishga solinadi va asal qo‘shiladi. Aralashmani bir qancha muddat davomida muzlatkichda saqlash mumkin.
Izoh (0)